Make your own free website on Tripod.com

Bulan Sunyi Kambang Tarati

Oleh : BURHANUDDIN SOEBELY

       Alalia pun apa karsani. Sarang sakanyar sakanyari. Surup Sangiyang Pancipta Sajati. Iya Sangiyang Pancipta Sajati iya Sangiyang Sukma Suwara. Iya Sangiyang Sukma Suwara iya Sangiyang Wanang. Sapirang-pirang gamburi manciptaakan tujuh lapis langit tujuh lapis bumi, luas baampar nangkaya tikar. Wayah langit lawan bumi dikawinakan balalu kadangaran bunyi saling hangkuian nangkaya bunyi baimbai sajuta patir. Bumi bagantar, timbul giri sita wita; giri tu gunung; sitaitu batu; wita tu banyu; timbul gunung batu lawan banyu. Langit baguncang, timbul danawa gani; danawa tu raksasa, gani tu api; timbul api raksasa, luruh matan langit basarusup ka dalam bumi.

         Jadi kada kaya paribasa, bumi tapusing, gunung batu pacah dua, manggurak banyu. Ampak-ampak surya chandra kukus samarang langit, diampak surya chandra kukus ka langit. Surya tu matahari, chandra tu bulan, dijadiakan matan pacahan gunung batu. Kukus jadi awan. Buih-buih banyu bahindang bahindawa nangkaya balahindang, mangalir sapanjang lurung. Buih hijau jadi kakayuan. Buih suklat jadi gunung jadi bukit. Buih biru jadi lautan. Buih kuning jadi sungai manyungai. Buih habang jadi sagala margasatwa. Buih putih manjadi diwa-diwa, batata-batara, bubuhan sangiyang bubuhan bidadari, bagana di Junggring Salaka atawa Kuta Miring Kayangan. Lalu tanah ditampa dikarut lawan rambut, ditiupakan panyawaan, manjadi manusia; bagana di marcapada bumi lamah.

       Langkap sudah babuka alam pawayangan, baatur kahidupan dua pindua, kahidupan nang saling bapasangan anatapi saling batimbangan: ada langit ada bumi, ada bulan ada matahari, ada bintang ada kakayuan; siang lawan malam, sugih lawan miskin, salah lawan bujur, atas lawan bawah, jahat lawan baik, anum lawan tuha, laki-laki lawan bini-bini.

      Limbah ditatapakan hidup dua pindua, ditimbulakan barjangga pati. Jangga nitu tulisan. Pati nitu mati. Ditimbulakan tulisan atanapi garis mati, pawatasan antara hidup lawan mati. Jadi satiap mahluk nang hidup musti batamuan lawan mati. Kada siang kada malam, kada halus kada ganal, kada tuha kada anum, ada marga atanapi kadada marga, lamun hampai watasnya musti datang nang bangaran Batara Yamadipati, utusan Sangiyang Sukma Suwara gasan mancabut nyawa.

          bangayu manis taga mambi
         manarutukan lalakun diri
          iyaiiii........      

RAJAH KAMBANG TARATI

Alalia! Jajar jajari, jajar pasiban sintan. Bajajar urang di Nagara Astinapura. Ini Astinapura tamasuk nagara nang panjang apunjung pasir wukir luh jinawi, gamah ripah karta tur raharja. Disambat nagara panjang apunjung karana Astinapura mimang panjang wan libar dalam ukuran, artinya luas banuanya. Disambat pasir wukir luh jinawi, karana Astinapura nagara dinginan, subur tanahnya, nangapa nang ditanam tumbuh marimbun. Disambat gamah ripah karta tur raharja karana Astinapura mimang aman makmur, murah barang rupa-rupa. Aman, karana kadada kajahatan; jangankan manjumput barang urang, salipi gugur gin kadada nang maambil cawali ampunnya; maninggalakan rumah kada sarana bahayaan, kada parlu basunduk lawang jandila karana kadada maling kadada bigal. Makmur, karana saluruh anak kampung bumi putra hidup bakacukupan. Murah barang rupa-rupa karana mimang sagala barang di banua lain ditukar larang dijual murah di Astinapura.

Siapang nang mundak jumanang nata marang niki nagara, ujar kita siapa nang manjadi raja di Astinapura, masa dua talu nang bangaran Parabu Santanu, putra maruhum Parabu Paratipa lawan Diwi Sumanda. Mamarintah adil bijaksana, lamah limambut tutur basa, dihurmati kadang kadian, dicintai saluruh hamba rakyat.

         Siapang nang manjadi pandal urang Astinapura, masa dua talu nang bajujuluk Aria Basuwanda. Ini urang digjaya pangindar diwa: awak nahap, pagalangan ganal; wani ada wan inya, taguh ada wan inya, gancang ada wan inya; baisi pajimatan sabalit pinggang, cakap mamimpin paparangan; lamun sudah malabuni tandingan balabar kawat, inya manimpas manyuduk manumbak nang kaya macan pagat ikatan.

       Parabu Santanu baisian bini nang bungas langkar muhanya, nang bangaran Diwi Ganggawati. Diitihi muha, diliat pangawak, ditilik kabagusan hati wan kalakuan, nginih Diwi Ganggawati jarang sasamaannya; nang kaya Diwi Sinta bini Batara Rama bahari, nang kaya Diwi Sari bidadari kayangan bini Sangiyang Wisnuraga. Manurut di dalam caritanya, limbah pitung tahun kawin lawan Parabu Santanu hanyar Diwi Ganggawati batianan. Wayahini lagi mahadang bulan manyampaian ari maranakakan urang nang lawas diangan-angan, maranakakan katurunan bubuhan raja-raja basar.

         Alam umpat basuka barami wayah tian Diwi Ganggawati hampai arinya. Bulan bulat bulaling, mangkunung di langit. Bintang kilip-kilip, carunungan nang kaya lampu-lampu bidadari kayangan. Kakambangan di taman kadatun sama pada malarak, bahanu balingguk ka kiwa bahanu balingguk ka kanan, nangkaya urang galianan digaritiki angin. Dadaunan kitik-kitik nangkaya urang baampik. Jangkrik pada babunyian, balagu lamat-lamatan nang kaya suara gamalan, baagung suwara kungkung. Kunang-kunang tarabangan ka situ ka sana nang kaya urang batandiki mambawa lantira. Di Balai Panghadapan, hati Parabu Santanu kitir-kitiran, linjang-linjang kada karuan, mahadang timbulnya tangis anak. Bahanu inya bajanguk ka muhara lawang kaguringan, manyingkai dinding lawang, calingukan maitihi bubuhan bidan nang magun manggarumbungani Diwi Ganggawati.

        “ Jang Sinuhun Parabu Santanu, sampian jangan bajinguk. Ujar urang bahari pamali, kawulunan. “ ujar bidan nang tatuha maingati.

        Parabu Santanu mahiut hinak ganal, linjang-linjang pulang hampai panat saurangan. Lalu bahindapang di tihang balai panghadapan. Maaaur pikiran, maaaur pangrasa nang kada karuan, inya mancangangi saputar balai panghadapan, nang kaya urang hanyar sakali tu ada di situ. Pandangannya sangkut ka dadampar kancana, kursi karajaan nang kasandarannya baukir halang tarabang baurak halar, nang kaingkutan subalah kanannya bahias ukiran naga balimbur, nang kaingkutan subalah kiwanya bahias ukiran ular lidi malancar. Di balakang dadampar kancana bajajar salikur tumbak: sapuluh di kiwa, sapuluh di kanan, sabilah di tatangah, manandaakan dua puluh karajaan nang ada di bawah taklukan Astinapura; di situ ada tumbak biring lanang, sapit tabun, sangkuh, bigi waluh, buru kuping, biring wadung. Lalu diitihinya pulang dinding banyau guci jurai kaamasan: di patangahan ada gambar kambang dalam jambangan, manandaakan karakatan hidup urang Astinapura, aci baruruhuian; di pambapang bawah ada gambar kangkung kaumbakan, manandaakan urang Astinapura rajin bausaha cangkal bagawi wan rata-rata tahan huhuas; di punca ada gambar pancar matahari, manandaakan hati nang barasih, aci disuluhi ulih Sangiyang Sukma Suwara; di pambapang atas basusun gambar tampuk manggis kambang pitu, manandaakan napa nang diucapakan nang kaya itu jua di hati, kada pampat di dalam rincung di luar. Muyak baliliat, Santanu lalu baduduk di atas dadampar kancana. Saikung amban manjurungi banyu. Limbah nginum habis sacangkir asa talapang hinak Santanu.

       “ Adimas Aria Basuwanda…” ujarnya sambil bapaling ampah ka Aria Basuwanda nang duduk basila kada jauh tumatan dadampar kancana.

        “ Inggih, ulun pun Aria Basuwanda. “ Aria Basuwanda manangkupakan talapak tangan, maatur sambah. ” Karsa sampian kaya ngandi kawulunan? ”

       “ Pangrasaku kada karuan, Yayi. Asa baduduk kada badiri kada. Dadaku galudupan, dagup-dagup nang kaya babun dicatuk nang kaya agung dipalu. ”

        “ Lun inggih kawulunan. Pangrasa nang kaya itu hal nang wajar pun, napalagi ini anak nang panambayan, wayah nang balum lagi tajalani saumur janang. ”

           “ Iya, Yayi. Banyak hudah aku mamimpin paparangan, manajuni kalahi, kada kaya ini aku pangrasa. ”

          “ Ulun bahari labih pada sampian. Wayah mahadang ngiar tangis anak ulun nang panambayan tu jarujuhan pun ulun paluh. Habis jutu ulun baju salawar. ” sahut Aria Basuwanda, manggayai Santanu. ” Jaka bangsa paluh tu dihilung, sacuntang kira-kira ada pun. Lamun dikinum buntau pang parut. ”

        Lihum Santanu mandangar. Di mata Aria Basuwanda lihum nang cungul di muha rajanya tu nang kaya bintang bakilip di kadap malam, napang mulai hintadi pamarum muha Santanu tu karing wan irang irutan, parcis kalaras.

        “ Ada mamarina ulun tu lain pulang pun parigal sidin. ”

        “ Dimapa, Yayi? ”

        “ Mahadang bini baranak ni bakunyung pun sidin di sungai. ”

        “ Bakunyung? ”

        “ Inggih, bakunyung. Lamun tapikirakan bini di rumah laluai kada tagarak lagi batis wan tangan, tinggalam batu sidin. Jadi daripada mati lamas, ampih sidin mamikirakan bini, mamikirakan bakunyung haja. Kunyur-kunyur sidin subarang manyubarang sungai, jaka kada datang urang mambawa habar pada bini hudah taparanak kada ampih sidin bakunyung. ”

        Lihum pulang Santanu. “ Bursiahalah dua hari malam hanyar bini taparanak kaya apa sidin, Yayi? ”

        “ Cah antara dua haja, mun kada mati lamas mati disambar buhaya. ”

      Mangalangkang tatawa Santanu. Mandangar raja tatawa, Aria Basuwanda mancacari pamandiran lain, pandiran mahaluya nang kawa manimbulakan tawa sang raja.



        Wayah kadangaran tangis kanak-kanak dalam kadatun, balalu cungul gara-gara. Langit malam nang kaya kain hirang. Awan baubah kundum, bagasak bajalan nang kaya kuda hirang bukahan di tangah padang. Bulan nang hintadi bagantung hilang cahaya. Bintang-bintang nang tadi bakilip kada tahu kamana hilangnya. Kilat sambung-manyambung. Guntur patir galantaran. Hujan rimis-rimis. Tacium bau kambang nang dihambur bidadari kayangan. Lalu kadangaran bunyi mangguruh, bunyi nang ditimbulakan angin tutus, baputar-putar nang kaya gasing di alun-alun. Kada sawat lawas mandabuk rabah tihang bandira Astinapura. Tabarubut waringin kurung kambar dua nang tumbuh di halaman kadatun. Takajut Parabu Santanu. Badadas manyasah ampah ka lawang kadatun, baimbai lawan Aria Basuwanda. Limbah malihat tihang bandira wan waringin kurung nang rabah ampah ka matahari pajah, malibuk pulang hati Parabu Santanu. Sambil mahiut hinak basar inya baunang marang raga, bapandir di dalam hati. Ujar Parabu Santanu, parigal alam nang kaya malam ini pinda lain pada biasa. Manurut urang-urang bahari, lamun tihang bandira wan waringin kurung rabah ampah ka matahari pajah nitu manandaakan bakal datang lara kabaratan. Tapi lara kabaratan nang kaya apa garang nang cagar malingkup Astinapura?

        “ Pangrasaku sasain kada nyaman, Yayi. ” ujar Santanu tarus maiitihi akar-akar waringin kurung nang kaya jarigi raksasa handak manguracak kadatun Astinapura.

        “ Jang Sinuhun, lamun ari maram lalu timbul angin tutus nang marabahakan kakayuan, rumah atanapi tihang manihang, makaam nitu sudah adat parigal alam. ” Aria Basuwanda manyahut manggaganalakan hati Santanu. Inya indah lamun junjungannya kada nyaman hati kada nyaman pikir wayah manyambut kalahiran anak nang sudah diangan-angan batahun-tahun.

        “ Tagal, Yayi, parigal alam wayah nang kaya ini rasanya lain pada biasa. ”

        “ Ulun pikir ninih kabalujuran haja, kawulunan. ”

       “ Lamun ninih kabalujuran haja nyaman hatiku, Yayi. Nang mambaratakan pikiran nitu bursiah ni banaran tanda-tanda bakal datang lara kabaratan. ”

        “ Jang Sinuhun, paraya ah dahulu sampian mamikirakan nang kada karuan. Hintadi ti lamat-lamatan ulun mandangar ada siwara tangis kanak-kanak, agin itu siwara anak sampian, kawulunan….”

        Balum lagi tuntung mamandirakan, saikung amban datang manyambah. Parabu Santanu bapaling, mamandang amban nang takurihing. Malihat kurihing amban, rasa nyaman hati Parabu Santanu karana kada mungkin mambawa habar lara sambil bakurihingan.

        “ Jang sinuhun Parabu Santanu, anak sampian sudah lahir. ” ujar amban.

        “ Syukur bagia. “ Parabu Santanu manyahut. “ Binian atawa lalakian? ”

        “ Lalakian, kawulunan. ”

        “ Syukur bagia. Baarti sudah ada urang nang cagar mawarisi dadampar kancana Astinapura. ” ujar Parabu Santanu sambil lihum bapair.

        “ Inggih. Mudah-mudahan putra sampian dibarkati malih Diwa Mulia Raya. ”

        “ Amban, sudah bulihkah aku masuk ka dalam anjung? Sudah kawakah aku maitihi anak wan biniku? ”

        “ Inggih, sudah bulih, kawulunan. ”

        “ Yayi Aria Basuwanda! ” Santanu mangiyau Aria Basuwanda.

        “ Ulun, Kanjang Parabu. ”

        “ Ayu ikam aturi barang rupa-rupa nang rusak ulih angin tutus. ”

        “ Lun inggih sandika. ”

       “ Siapakan saluruh bala tantara nang ada di pitung walas binting kita. Parintahakan mamariksa watas karajaan, amun pang banaran datang gangguan nang kada-kada, kasian hamba rakyat kita kaina, Yayi. ”

        “ Karsa sampian ulun junjung di atas batu kapala.”  Aria Basuwanda maatur sambah. “ Muhun pamit, Kanjang Parabu. ”

        “ Yaah, diaturi, Yayi….”

        Aria Basuwanda sigra maninggalakan kadatun. Malam makin muru. Hujan batambah labat. Bahanu-hanu kadangaran kutang kuncahungan, nang kaya bunyi gamalan mairingi jajak langkah hantu-hantu malabat saking jina marung.

        Di dalam kamar kadatun, Santanu maiitihi putranya nang taguring di atas kasur diwangga di higa Diwi Ganggawati. Disingkainya salimput anak, dilihatinya jarigi tangan jarigi batis, saraba lang-kapan haja. Himungai inya karana anak lahir kada kurang suatu apa. Kalu ada jua nang pinda lain di awak anak maka itu cuma ada di balukuk tangan kanan. Di situ ada tutang atawa rajah bagambar kambang tarati satangah malarak.

        “ Yayi, Adimas, buah hati jantung pangarang pangrasuk raga caramin mata. ” Santanu baucap ka alah bininya sambil duduk di pinggir kaguringan.

        “ Inggih, ulun kawulunan…” Diwi Ganggawati manyahut sambil manangkupakan tangan di hadapan dada. “ Ulun muhun nada sapura, banyak-banyak minta maaf karana ulun balum lagi kawa duduk, balum kawa maatur sambah lawan sampian. ”

        “ Kada papa, Yayi. Suka hatiku maitihi putra kita lahir kada kurang suatu apa. Suka jua hatiku maitihi ikam tatap sigar, Yayi…”

        “ Inggih, barakat pangasih Sangiyang Sukma Suwara, Kangmas.”

        “ Iya, Yayi. Bawilang tahun kumimpiakan baisian anak, ari ini tulus sudah kahandak. ”

        “ Ulun jua suka hati kawa manyampaiakan kahandak sampian. ”

        “ Kita bari ngaran siapa anak kita ni? ”

       “ Tasarah sampian, kawulunan. Sampian urang nang bapangatahuan, nang banyak baisi pangalaman, tantu tahu ngaran nang rasuk gasan anak kita. Ulun baharap ngaran nang sampian pilih kaina kada mambarati hidup anak kita, nyaman didangar wan baisian arti nang bagus. Mudahan kaina lamun inya ingat arti ngarannya lalu inya kada maulah gawian nang kada karuan awan tatap dikasihi Diwa Mulia Raya, tatap disayangi wan diingat saluruh mahluk marcapada sapanjang masa. ”

        “ Iya, Yayi. Maulah ngaran mimang kada kawa sambarangan. Salah-salah kaina kada cuma manyanghara ka diri saurang tagal jua manyanghara urang banyak, maulah jalan kita kada mau hampai ka surga. ”

        Diwi Ganggawati bahiring, mambujurakan salimput anak.

        “ Barapa hari nang lalu aku ada pang sudah manyadiakan ngaran gasan anak kita. ”

        “ Siapa ngarannya, Kangmas? ”

       “ Karana lahir lalakian, anak kita ni kubari ngaran Radin Diwabarata. Iya Radin Diwabarata iya Bisma. Diwabarata nitu artinya katurunan juriat Barata nang luhur. Ada pun Bisma nitu maknanya harat bakaliwaran. ” ujar Santanu sambil mamusut wan maniupi bumbunan anaknya.

        “ Ulun katuju mandangar ngaran nitu, Kangmas. Mudahan inya tarus ingat kalu awaknya tumatan  juriat kulawarga Barata, juriat nang hudah maadaakan pamimpin-pamimpin nang dicintai saluruh hamba rakyat, kawa manjaga kalakuan kadak dimuari urang. Mudahan jua harat nang dimaksud nitu harat nang kaya rapun banih, makin baisi ilmu atanapi makin baisi harta inya makin barandah diri. ”

        “ Nitu nang ku maksud, Yayi. “ Santanu lihum lalu mamusut ka rambut nang bini. Di pusut nang kaya nitu lihum jua Diwi Ganggawati.

        “ Ari sudah labih pada tangah malam. Ayu ikam malalamarakan raraga awak. Aku guring ka kamar subalah, Yayi….”

        “ Inggih, napaapa ujar sampian, Kangmas….”

        Santanu mancium dahi anak wan bini lalu bajalan ka kamar subalah. Limbah mangancing lawang inya mamarintahakan supaya jumlah punggawa nang bajaga di parak lawang kamar ditambahi.



        Wayah Diwi Ganggawati tatinggal baduduaan lawan anak balalu bangsul bini-bini baik rupa. Kada tahu matan mana datangnya, tang ada ha di buncu paguringan. Padahal jandila bakancing lawang bakantup, lagian jua kada jauh pada muhara lawang paling kada bapuluh punggawa lawan amban bajaga. Takajut Ganggawati, takipik nangkaya urang di-sangat sapit kaya, malatik bangun pada karabahan. Burit tundunnya mandisap. Matanya kilip-kilip mancangangi si bini-bini nang kalihatan lihum bapair. Bibinian tu langkar bakaliwaran. Bakulit putih mampilak nang kaya gadang dikuyak. Awak tinggi limampai. Bapakaian saraba hirang. Rambut ikal mayang, panjang taurai lacit ka batang paha. Baamar burung marak basampuk patuk. Bakilat bahu burung halang tarabang.

        “ Wayah dipawayah, tata dipatata, datang-datang kada diundang. Siapa ikam? ” Ganggawati managur sambil malindungi Radin Diwabarata lawan awak.

        “ Aku urang kada bawatas, urang kada bawayah. ”bibinian tu manyahut.

        “ Ngaran siapa? “

        “ Lamun aku manyambat ngaran ikam jangan takajut. ”

        “ Masa aku takajut mandangar ngaran urang nang kada bakapatuhan. ”

        “ Kita sabujurnya hudah lawas bakapatuhan, cuma ikam tahu dingaran haja kada tahu dirupa. ”

         Ganggawati maiitihi bahimat sambil maiingatakan kalu banaran sudah bakapatuhan, tapi tabulangkir pangingat asa kadada jua kapatuhan nang kaya bini-bini tu.

        “ Ikam parayaah bacacapatian. Ayu sambat siapa ngaran? ”

        “ Aku Batara Yamadipati! ”

        Batara Yamadipati? Diwa nang diutus Sangiyang Sukma Suwara mancabut nyawa manusia? Tacaragal Ganggawati, rasa kada parcaya lawan napa nang didangar.. Laluai sunyi malingkup anjung. Kalu ada jua siwara maka itu cuma siwara angin nang mandasau di dadaunan, siwara hujan di atas hatap, halulung kutang di kadap malam, atawa siwara hinak Ganggawati nang rasa tasangkut di rakungan.

       “ Pintar banar ikam bagaya. ” ujar Ganggawati. “ Cuma malahuya sual kamatian anatapi sual Batara Yamadipati itu kupikir katalaluan. ”

        “ Aku kada bagaya, kada jua mahaluya. “ ujar bibinian tu, tatap sambil lihum bapair.

       “ Masa Batara Yamadipati babantuk raraga badan bini-bini. Matan datu nini bahari, turun-timurun kisah, nang bangaran Batara Yamadipati itu laki-laki. Ngarannya haja gin Batara, bukan Batari Yamadipati. “ Gangawati mangaras.

        “ Aku sabujurnya urang kada barupa, urang kada babantuk. Bantuk raraga badanku sasuai lawan amal parbuatan urang nang cagar kucabut nyawa-nya. Lamun urang itu baik amal parbuatannya, taat lawan Sangiyang Sukma Suwara, maka aku datang bisa barupa bini-bini anatapi laki-laki bagus rupa, lalu maambil nyawa sabagaimana urang mamusut awak. Tapi lamun urang tu tatarusan mamparbuat napa-napa nang kada dibulihakan Sangiyang Sukma Suwara maka aku datang bararaga badan raksasa, tinggi basar bataring bakuku panjang, lalu maambil nyawa nangkaya babi manguracak gumbili mantah. ”

        “ Nyaman haja pang bapandir, tapi mambukti-akan apa liwar sakatnya….”

        “ Sakijip mata gin kawa babukti. ”

        Tuntung baucap lalu bibinian nang mangaku Batara Yamadipati tu maubah diri. Panambayan inya baubah manjadi laki-laki baik rupa, bapangawak sadang, kalihatan lamah-limambut. Lalu baubah pulang jadi laki-laki nang pinda ga’as, bamuha habang bamata mancurung. Kada sawat lawas baubah pulang jadi raksasa, badada pitung kilan, mancugut hampai ka bubungan, bataring bakuku panjang, kalihatan darah jarujuhan matan muntung. Kalas Ganggawati. Muntung tanganga, mata tabilalak. Handak bakuciak papar kada kawa, nang ada hingganya suwara ah-uh-ah-uh kaya urang bisu. Batara Yamadipati lakas babulik jadi bibinian hintadi.

        “ Parcaya kalu hudah lawan diaku? ” ujarnya sambil baduduk di buncu paguringan.

        “ Inggih. “ Ganggawati babaya kawa basiwara.

        “ Iya damintu. “

        “ Napa maksud sampian bahaliwawat di kadatun Astinapura? ”

        “ Aku bailang. “ ujar Batara Yamadipati.

        “ Jadi sampian bailang banar haja…”

        “ Yah, bailang banar haja. Tapi bailangku bukan sambarang bailang. Bailangku musti baurusan lawan kamatian. “

        “ Jadi cagar ada nang mati di kadatun Astinapura? ”

        “ Yah, cagar ada nang mati. ”

        “ Lamun cagar ada nang mati kasiam jangan anak ulun….”

        “ Ooohh, kada, bukan anak ikam. ”

        “ Lalu siapa? ”

        “ Ikam, Diwi Ganggawati. ”

        Mandangar cagar mati, tangis manggusak di dada Ganggawati tapi sabulih daya ditahani kaluarnya. Banyu mata nang handak lilih tagana di bulu mata, kunung-kunungan nangkaya ambun bagantung di daun. Jadilah matanya kaya dilapisi anak-anak kabut nipis nang balayap di sala rapun kakayuan.

        Sambil mancangangi Batara Yamadipati, Ganggawati maimpu anak ka batang paha.

     “ Niang Batara, sual mati ni, nang ngaran hudah garis Sangiyang Sukma Suwara, ulun siap manjalani. Tagal purunlah sampian lawan anak ulun, hanyar inya diranakakan, sudah harus bapisah lawan kuitan….” Ujarnya sambil manating anak.

        “ Ini bukan sual purun atawa kada purun tagal sual parjanjian ikam bahari lawan Sangiyang Sukma Suwara. ”

        “ Inggih, ulun mangarti, tagal lamun lakas ulun mati badimapa anak ulun. ”

        “ Ikam kada parlu mamikirakan karana sual maharagu anak itu sual urang nang hidup, sual laki ikam. ”

        “ Lalu pabila sampian maambil nyawa ulun? ”

     “ Saharusnya ari ini. Tapi nang ngaran Sangiyang Sukma Suwara tu pangasih panyayang lawan diikam, maka dibari kalunggaran pitung hari. ”

        “ Pitung hari? ”

        “ Yah, pitung hari. Jadi dalam pitung hari ini, ayu ikam bapuas-puas lawan anak ikam, bapuas-puas lawan kahidupan marcapada bumi lamah. Lamun ada nang handak dimakan, makan ulih ikam. Ada nang handak dinginum, kinum. Ada kahandak nang balum tulus, tulusakan. Tampulu arinya lagi ada, tampulu diri lagi iskaya. ”

            Tuntung baucap Batara Yamadipati mambunyiakan ibu jari wan jari tangah tangan kanan, cungul kambang tarati putih nang satangah malarak, sama lawan rajah di balukuk tangan kanan Diwabarata.

        “ Niang Batara, supaya ulun nyaman hati ma-ninggalakan anak, bulihlah ulun batakun nangkaya apa jua hidup Diwabarata kaina. ” ujar Ganggawati.

        “ Jalan hidup anak ikam sabagaimana rajah kambang tarati nang ada di balukuk tangannya itu. ” sahut Batara Yamadipati sambil maandak kambang tarati wan manunjuk rajah di balukuk tangan Diwa-barata.

            Ganggawati mangilar ka alah rajah di tangan anak lalu batakun pulang:

            “ Arti rajah kambang tarati ni kaya apa garang? ”

           “ Rajah kambang tarati tu manandaakan anak ikam bakal jadi satria utama, urang digjaya pangindar diwa, urang nang diharagai wan dimalui satria-satria lain….”

            “ Sukur bagia, kawulunan…”

       “ Lagi jua kaina anak ikam ni bakal jadi urang nang batimbang rasa, mandahuluakan kapantingan urang dibanding kapantingan saurang. Putih hatinya, tahu mambalas budi. Sagunung urang mambari budi talu buku gunung inya mambayari. Jadi, karana kalakuan nangkaya itu inya bakal jadi kambang pandiran urang, jadi cuntu sapanjang masa. ”

            Lihum sambil untuk-untuk Ganggawati mandangar.

            “ Nyaman hudah hati diulun mandangar kahidupan anak ulun kaina. “

            “ Ganggawati, ada lagi sabuting kalabihan-nya….”

            “ Napa lagi, kawulunan? ” Ganggawati lakas mamagat ucapan Batara Yamadipati.

            “ Aku kada kawa baparak lawan diinya lamun kada dikahandakinya. ”

            “ Maksudnya? ”

            “ Diwabarata kada kawa mati lamun kada kahandaknya saurang! ”

            Tuntung baucap lalu hilang Batara Yamadi-pati. Limbah hilang Yamadipati banyu mata nang tadi sangkut di bulu mata Ganggawati barubuian ka atas kasur diwangga. Dipandanginya muha Diwabarata, dipusutnya bumbuman anak. Palihat Ganggawati, kakanak nang hanyar diranakakan tu babuka bibir baungkai lihum. Balalu makin daras banyu mata Ganggawati.

            cikang hambawang, anakai, undayang sangkut
            datang bailang, anakai, umbayang maut

            kayu bidara, umai, rapai diipi
            banyu mata, umai, sungai di pipi



       Pitung hari pitung malam urang Astinapura basuka-barami, bakarasmin macam-macam. Ari kadua, pitung ikung ning rangda diparintahakan ma-ambil banyu di pitung buah talaga nang dikara-matakan urang Astinapura; diarak di atas kurita kancana; tiap kurita ditarik pitung ikung kuda putih; diringi para punggawa lawan urang-urang nang kada baranti mancatuk gamalan wan mambanam manyan. Ada nang ka Talaga Sumala, talaga nang bahari jadi wadah pamandian Diwi Anjani wayah manianakan Anuman Pancasuna. Ada nang ka Talaga Siring Kambang, talaga nang jadi pamandian Diwi Kama-ratih, bidadari kayangan bini Batara Kumajaya. Ada nang tulak ka Talaga Kandawa, talaga nang diku-lilingi hutan labat; hutan nang pada jamannya kaina dibuka ulih Pandawa Lima wayah mandiriakan ka datun Amarta. Ada nang manyipat ka Talaga Tawing Giri, talaga nang ditawingi sawalas buah gunung; andaknya kada jauh pada padang Kurusitra, padang nang kaina jadi galanggang kalahi pawa-kasan antara Pandawa lawan Kurawa. Ada nang ma-ampah ka Talaga Bintang Bacaram, talaga nang kada jauh pada muhara patapaan Gunawan Wibisana, ading Dasamuka, limbah tuntung paparangan antara Pancawatidanda lawan Inglangkung Alingka Diraja. Ada nang marambah ampah ka hutan Candrakastu, maambil banyu talaga wadah palimburan Sangiyang Antabuga nang babantuk raraga badan naga. Ada jua nang tulak maambil banyu Talaga Labur Sakati, talaga nang biasa jadi panginuman Jatayu, burung garuda nang sawat manyimbat Diwi Sinta wayah diculik Parabu Dasamuka.

        Di alun-alun hadapan kadatun Astinapura didiriakan balai padudusan: balalangit kain kuning, dikulilingi runtaian-runtaian kambang malati; tihang ampat buncunya diandaki mayang baurai, tumbak wan payung;  Di dalam kadatun, amban-maamban galiyuran: ada nang manyadiakan lampin-malampin, ada nang manyalaakan parapin lalu mamarupui garu wan manyan putih, ada nang mahidupi api manjarang banyu, ada nang mananggar pangawahan, ada nang mamirik sambal-manyambal, ada nang maulah am-pat puluh satu macam wadai, ada nang mamasaki parapah hayam parapah kambing, ada nang mahiris-hiris daging hadangan; rata-rata bagawian, manyi-apakan sagala sasuatu sagan mandudus urang nang digadang-gadang jadi pawaris dadampar kancana Astinapura.

        Ari katujuh, hibak urang di alun-alun, manyak-siakan Parabu Santanu handak mandudus Radin Diwabarata. Liwat tangah hari, kadangaran siwara gamalan situ garincing situ malabat, malaguakan galaganjur. Di bawah putaran payung babar kait landian amas landian kancana, Santanu balangkah matan kadatun, di higanya bajalan Diwi Ganggawati sambil mangilik Radin Diwabarata. Katiganya bapakaian saraba kuning, garirapan ulih yakut jam-brut nilam biduri, bahias nang kaya pangantin handak ditataiakan.

         Ganggawati rupanya singhaja kada bapadah sual kamatiannya lawan Santanu. Ujar Ganggawati, Kakang Santanu ni lagi hihimungannya, lamun aku bapadah cagar mati labaram kucai barataan. Daripa-da kucai barataan baik parak wayahnya kaina haja aku bapadah. Jadi mun dilhat pamarum muha Ganggawati, jangankan urang lain Santanu gin kada mangira kalu tangis diam-diam tasulipit di dalam hati. Muha Ganggawati satitik kadada manampaka-kan rasa sadih, tatap mangkining nangkaya bulan ampat walas; bibir bilang kada baranti maungkai lihum; jajak batis ringan manurutakan bunyi agung, bajalan nangkaya urang balangkah di papan satampik.

           Di balai padudusan sudah disadiakan sagala macam paralatan sagala macam sasajian. Ada mija ganal balapik bamban bajalin, di atasnya sasanggan barajah naga barabut kumala basaung buntut baisi banyu pitung talaga bakambuh ampat puluh satu macam kambang, cupu baisi minyak likat baburih, karis iluk sanga, palita banyala wan parapin nang mahambur harum manyan putih. Di parak mija, badiri Bagawan Kasapa urang Paratapan Sumbar Walirang nang dihurmati karabat Astinapura. Diiringi gamalan balagu galaganjur Radin Diwabarata diandak di atas bamban bajalin, diman-dii ulih Bagawan Kasapa lawan banyu pitung talaga. Limbah dimandii kapala digacakakan talu kali ka rajah kumala naga supaya karas sumangat, tangan dijapaiakan ka karis supaya wani saumar janang, bumbunan dipapai lawan minyak likat baburih, di mata hagi ditandai cacak burung lawan harang sumbu palita, lalu diukup di atas parapin. Limbah diukup disalimputi lawan kain kuning, dibacaakan isim-isim ditiupakan talu kali ka muha lalu disaraha-kan ka alah Ganggawati.

        Lagu gamalan baalih ka sakatin, lamat-lamatan kadangaran urang manyindin pangkuran, mamuja-muja kabasaran urang nang didudus. Ganggawati bajalan mambawa Diwabarata mangulilingi badai padudusan talu kali sambil dihamburi baras kuning ulih Bagawan Kasapa. Wayah mambajui manyilawari Diwabarata, Ganggawati mandangar Bagawan Kasapa babisik.

        “ Ganggawati, datang hudah urang maambili. Cuba ikan lihati panggar balai padudusan….”
Ganggawati manulih ka alah Bagawan Kasapa lalu manyirit panggar balai padudusan, dilihatnya Batara Yamadipati duduk bajuntai di situ.

        “ Ganggawati, ayu, satumat lagi hampai wayahnya…” siwara Batara Yamadipati mangiang di talinga Ganggawati. Gangawati bauntuk lalu bapaling ka alah Santanu. Raja Astinapura tu kada ham mangira apa-apa, mancangangi Gangawati wan anak sambil lihum bapair.

       “ Kakang Santanu….” suara Ganggawati gimit haja nangkaya urang babisik.

        “ Napa, Yayi? ”

        “ Ulun banyak-banyak minta ampun minta rida kalau salawas kita balaki-babini ada kalakuan anatapi ucapan ulun nang kada manyamanakan hati sampian. ”

      “ Yayi, jantung pangarang pangrasuk raga caramin mata, ganal gunung ganal lagi hatiku, luas sagara luas lagi hatiku,Yayi. Sabalum ikam baucap minta ampun minta rida, sudah kuampuni sudah ku-ridai. Mudahan kita balaki-babini tuntung pandang, aci ruhui rahayu hampai kaina datang Batara Yamadipati. ”

        “ Inggih, ari ini datang sidin, kawulunan….”

        “ Datang sidin? Siapa nang datang, Yayi? ”

        “ Batara Yamadipati, maambili ulun mahadap Sangiyang Sukma Suwara. ”

        Takarisut dahi Santanu. “ Yayi, ini wayah kita basuka-barami, jangan bapandir nangkaya itu kalu pinda kabalujuran, Yayi.”

      “ Ulun kada pandir gaya, kawulunan. ” sahut Ganggawati. “ Sampian barangkali kada malihat sidin sudah duduk bajuntai di panggar balai padudusan, manyampaiakan waktunya haja lagi. ”

        Santanu mancangangi panggar balai padu-dusan. Nang talihatnya cuma turus, riing, banang lawai babantang, runtaian malati nang baguyangan lawan larakan mayang pinang. Bagayakah biniku ni, ujar Santanu sambil maiitihi muha Ganggawati. Tapi muha Ganggawati kada mancaraminakan muha urang bagaya, malah Santanu malihat banyu mata kilir-kiliran, turun ka pipi, manguyayapi dagu, titik ka marcapada bumi lamah.

        “ Yayi, umailah, purunalah ikam maninggala-kan anak kita nang dihaja habang ni? ” suara Santanu babaya kadangaran, tinggalam ulih singguguk nang bausaha ditahan di dalam dada.

            “ Inggih, purun kada purun, nang ngaran hudah hampai wayahnya, Kangmas….”

           Santanu kada sing siwaraan lagi. Babuka mata Diwabarata, bakijip babarapa kali, karena banyu mata umanya titik ka mata. Bibir kakanak habang tu lihum, tangannya taangkat, manyintuh dagu nang uma. Makin labat tangis Ganggawati. Lalu disilak-nya udat, disusuinya anak.

           “ Anakmas Diwabarata, ayu ikam kinum samayu parut karana ini pawakasan ikam manginum banyu susu pun Uma…”
Sambil manyusui anak, Ganggawati lalu badundang:

           guring-guring anakku guring
            guring diakan dalam gindungan
            guring-guring anakku guring
            matanya kalat bawa bapajam

            kur sumangat
            si bintang timur si bintang timur
            mudahan ikam
            hidup babarkat

         Bakintip pulang mata Diwabarata. Bagamat Ganggawati malapas puting susu pada muntung anaknya. Diciuminya dahi wan pipi Diwabarata, lalu manyarahakan ka alah Santanu. Batara Yamadipati turun pada papanggar balai, bajalan ka higa Ganggawati.

        “ Kakang Santanu…” ujar Ganggawati. “ Ulun hampai wayahnya. Sapaninggal ulun, kasiam haragu baik-baik anak kita. ”

        “ Yayi, aku bajanji cawali kawa malangkahi mayat Santanu hanyar kawa maitu-maini anak kita, Yayi….”

        Ganggawati lalu basimpuh, sujud mancium batis Santanu. Urang nang malihat pada kalimbi-sikan. Lihati barataan, ujar urang, kaya apa baktinya Ganggawati lawan laki; kalakuan kaya itu patut dicuntuu ulih saluruh bibinian saputar Astinapura. Batara Yamadipati manjapai bumbunan Gang-gawati. Timbul kabut mangulingi awak Ganggawati, sasain lawas sasain banyak, sasain lawas sasain tabal. Lalu wayah angin daras batiup kabut hilang, hilang jua Ganggawati. Ruhnya disambut bidadari kayangan nang tarabangan sambil mahambur kakambangan.

        Aria Basuwanda kabuliangan, lakas manguciaki punggawa. Abutai bubuhan punggawa, gampar urang nang malihat, tapi Santanu lakas maangkat tangan, manyuruh badiam manyuruh baranai.

        “ Jang Sinuhun, ka mana bini sampian, kaluwunan? ” Basuwanda batakun.

        “ Bulik sudah inya, Yayi. ”

        “ Bulik pun? ”

        “ Iya, Yayi, bulik kaasuhan Sangiyang Sukma Suwara. ”

        Mandangar pandiran Santanu urang nang tadi basuka barami manggarung tangis. Hujan banyu mata sapanggiring alun-alun Astinapura. Rurumput-an wan kakambangan tatunduk layu. Daun kakayuan mangisuk dibisai angin. Burung-burung ampih tara-bang, ranai di kahinggapan. Kukupu maluak madu. Kasisiur malipat halar. Kundum langit. Muru mata-hari.



AMUK SAPANGGIRING MATAHARI PAJAH

       
        Alalia pun napa karsani. Limbah Ganggawati murca sayung kadatun Astinapura. Kakambangan di taman paguni haja pang balarakan tapi talihat hilang kabagusannya, labih-labih lagi dalam pandangan Parabu Santanu. Di taman tu Santanu rancak duduk taungut karana pikirannya basamut. Lamun disusuri cakada sual Ganggawati murca pang nang maulah pikiran Santanu dikuyayapi samut gatal, tapi sual Radin Diwabarata. Santanu urang nang bailmu jadi tahu banar hakikat hinggan kahidupan. Ujar Santa-nu, nang ngaran mati tu sudah garis Sangiyang Sukma Suwara; lamun ditangisi bahimat-himat bahu-jung manimbarati langkah nang mati mancapai sur-ga wayang; jadi nang parlu dipikirakan tu urang nang hidup; anak nang dihaja habang nih nang baulah pikiran basamut. Bawilang hari hudah anak-nya itu kada hakun manyusu. Dijurung ka alah kula-warga nang lagi baiisian anak susuan, hanyar talu hiutan muak Radin Diwabarata. Dijulung pulang ka alah kulawarga nang lain, sahiutan dua hiutan muak pulang inya. Kaya itu tatarusan.

        Nang ngaran sayang lawan anak lalu dikum-pulakan saluruh bini-bini nang lagi manyusui di Astinapura Jangankan manyusu babaya diparakakan ka puting susu gin sudah mangiar tangis Radin Diwabarata. Daai bibinian Astinapura balalar ka bibinian karajaan taklukan. Dalam timpu dua bulan ganti baganti salikur karajaan taklukan maangkut bibinian manyusui ka kadatun Astinapura tatap Diwabarata kada hakun manyusu. Inilah wahana nang maulah pikiran Santanu basamut siang ka lawan malam!

        “ Yayi, Aria Basuwanda, dimapa pikir, Yayi? ” siwara Santanu nang kaya urang babisik karana rasa sangkut di pahinakan.

        “ Inggih, muhun banyak-banyak diampuni, ulun asa kadada akalnya lagi, kawulunan. ” sahut Aria Basuwanda pinda lasu, napang utaknya taumpat basamut jua.

        “ Habis hudah bibinian nang manyusui di saputar Astinapura, saikung ikung ka dada banyu susunya nang rasuk lawan Anakmas Diwa Barata. ”

        “ Jadi habis hudah bibinian kita, Yayi? ”

        “ Inggih, hampai nang ka juruk-juruk, ibaratnya tu hampai nang tasusulapit di higa kalambu, hudah ulun angkut ka kadatun. Bibinian manyusui nang ada di karajaan taklukan kita damintu jua. Nang baisian kulawarga di karajaan lain hudah jua dikiawi, kawulunan. ”

     “ Ini rupanya lara kabaratan nang dimaksud wayah tihang bandira wan waringin kurung kita tabarubut dahulu. Lara kabaratan nang didatangakan Diwa gasan mauji diri Parabu Santanu. Hudah bini murca, anak ha pulang kada hakun manyusu. Wah, dimapa badanku, Yayi….”

        “ Dibawa basabar, kawulunan. Dibawa banyak baingat lawan Sangiyang Sukma Suwara. ”

       “ Yayi, aku hudah bajanji, sabulih daya maharagu Diwa Barata. Ibaratnya, Yayi, cawali ma-langkahi mayat Santanu dahulu hanyar kawa maitu-maini Diwa Barata. ”

      “ Inggih, ulun dapat mangarti napanapa nang sampian tanggung. Jaka pang kawa dibagi anatapi kawa dihurupi, daripada sampian labih baik Aria Basuwanda nang ampun sandangan. ”

        “ Ari ini ikam ambili Paman Bagawan Kasapa. Kita umpat batakun pikir lawan sidin, siapa tahu ada jalannya. “

        “ Lun inggih sandika. Muhun pamit, Kanjang Parabu. ”

        Aria Basuwanda manyambah lalu balangkah ka luar kadatun Astinapura. Maambil kuda lawan kurita, manyipat Paratapan Sumbar Walirang wadah patapaan Bagawan Kasapa.

        Di dalam sanggar pamucang atawa sanggar pamujaan, Bagawan Kasapa mamarupui manyan putih ka dalam parapin; badiri babatis tunggal, mambaca isim-isim sambil mahambur baras kuning; lalu duduk basila maminta pitua lawan Sangiyang Sukma Suwara. Kada sawat lawas bakiwit talinga Bagawan Kasapa, mandangari siwara nang mangi-ang kaya siwara kumbang di dalam talinganya.

      “ Jang Sinuhun Parabu Santanu, ini kada cuma ujian sagan andika tapi jua ujian sagan Astina-pura….” ujar Bagawan Kasapa limbah mambuka mata.

        “ Maksudnya macam mana? ” Santanu mamagat ucapan Bagawan Kasapa.

       “ Lamun dalam timpu lima bulan kada tadapat urang nang rasuk banyu susunya maka Astinapura habis umurnya. ” sambung Bagawan Kasapa.

        “ Astinapura habis umurnya? ”

      “ Yah, mimang habis umurnya. ” Bagawan Kasapa manyahuti. “ Lamun dalam lima bulan kada tadapat banyu susu bakal runtuh Astinapura. ”

        “ Umailah, tapi sual timpu itu sual kaina, sual utamanya ada kada bibiniannya. ”

        “ Saputar jagat pawayangan cuma ada saikung bibinian nang rasuk banyu susunya lawan Anakmas Diwabarata. ”

      “ Andak bibinian tu di mana garang? ” Santanu lakas batakun. Sumangatnya baganal mandangar ada bibinian nang rasuk banyu susunya.

        “ Manurut bisik nang ditarima, bibinian tu ada di ampah matahari pajah. ”

        “ Ngaran kampung atawa karajaannya? ”

        “ Kadada ngaran kampungnya, kadada ngaran karajaannya. ”

        “ Ngaran bibiniannya pang? ”

        “ Ngaran bibiniannya gin kada tahu kita. ”

        “ Lamun saraba kada tahu, di mapa kita mancarii, Paman Bagawan?”

        “ Bagagap nangkaya urang picak. Rujuk sana rujuk sini nangkaya urang mancari jarum di padang gayang banih. ”

        Mandam Santanu. Ibarat lantira, nang tadi nyalanya batambah ganal balalu kurup kahabisan minyak. Mancari bibinian nang kada tahu urangnya kada tahu ngarannya kada tahu kampungnya kada tahu karajaannya, dalam timpu lima bulan ha pulang, bukan gawian inting. Ujar Santanu, jaka tahu ngarannya barang, tanyaman jua cacariannya. Tinggal mamarintah saluruh punggawa Astinapura ditambah saluruh punggawa salikur karajaan tak-lukan mancarii bibinian nang bangaran si Anu maka dalam timpu sabulan saribu ikung nang bangaran si Anu barangkali tadapat. Tapi lamun bagagap nang kaya ini, talu tahun balum tantu batamuan.

        “ Barat banar gawiannya…” ujar Santanu sambil bahinak basar.

        “ Barat mimang, balum lagi syaratnya, Jang Sinuhun. ”

        “ Syarat apa? ”

        “ Nang tulak mancarii bibinian tu andika sa-urang, kada kawa disuruh nang lain, kada kawa jua andika diiringi urang lain. ”

        “ Lamun kaya itu kita kada kawa batunda ari lagi, malam ini jua ingsun tulak balalah ampah ka matahari pajah. ” Dikiaunya Aria Basuwanda. Aria Basuwanda baisut masuk sanggar pamucang, maatur sambah ka alah Santanu.

         “ Yayi, karana bibinian kita hudah habis maka harus mancari bibinian manyusui di luar watas Astinapura. ”

        “ Lamun nang kaya itu kahandak sampian, Aria Basuwanda sanggup mambawa Diwabarata mamutar jagat. Ulun lawan Diwabarata cakada bulik ka Astinapura lamun kada mambawa bibinian nang rasuk banyu susunya. Lamun hampai talu tahun kami kada bulik, itu artinya kami batinggal ngaran di banua urang. ”

        “ Yayi, kuharagai kasanggupan ikam. ” Santanu bausaha lihum mandangar kasanggupan Aria Basuwanda. “ Tapi, Yayi, sual malingling jagat ni kada urusan ikam. Ini urusan diri Parabu Santanu, karana anakku pang batagih banyu susu. ”

        “ Inggih, ulun mangarti. Tapi dalam sual nang kaya ini, urusan sampian sama lawan urusan Aria Basuwanda. Nang kaya ujar sampian hintadi, malangkahi mayat Aria Basuwanda dahulu hanyar kawa balalakun lawan Jang Sinuhun Parabu Santanu…. ”

        “ Kada, Yayi. ” Santanu mamagat ucapan Aria Basuwanda. “ Nang sakali ni aku saurang mambawa Anakmas Diwabarata malingling jagat. ”

        “ Sampian saurang pun? ” takajut Aria Basu-wanda.

        “ Iya, Yayi. ”

        Mandam satumat Aria Basuwanda. Matanya maiitihi muha Parabu Santanu, manaksir-naksir handak manawar putusan. Tapi dilihatnya pamarum muha Santanu hudah pamarum muha urang nang siap turun parantunan, pamarum urang nang balang-kah di watas antara hidup wan mati, pamarum urang nang kada kawa lagi ditawar kahandaknya.

        “ Lamun kaya itu kahandak sampian maka ulun iringi jajak langkah sampian. Salangkah sampian ka hilir salangkah jua ulun di balakang sam-pian. Salangkah sampian ka hulu, salangkah di balakang sampian kada tatinggal Aria Basuwanda. ”

        “ Jangan, Yayi. Lamun ikam umpat bajalan kaya apa nasib Astinapura, kahilangan urang nang kawa mamimpin kahidupan saluruh hamba rakyat. Siapang lagi cawali ikam nang kuharap-harap mamingkuti kapamimpinan lamun kaina kuting-galakan. Jadi, Yayi, aku bajalan saurangan, kada diiringi siapa-siapa, cawali mangilik Radin Diwabarata.”

        “ Wah, Jang Sinuhun…Jang Sinuhun. “ siwara Aria Basuwanda tadangar parau karana bacampur rasa hara. ” Muhun sampian pikirakan sakali lagi. Nang ngaran bajalan saurangan bagindungan anak ampah ka banua urang tu hibak lawan bahaya. Kada saikung, nang saikung pun baniat jahat. Napalagi lamun urang tahu sampian tu Parabu Santanu, Raja Astinapura. ”

          “ Yayi, masa ikam manidaakan kasanggupan Parabu Santanu? ”

       Aria Basuwanda tadiam. Mangarti pang inya kalu kahandak Santanu bujur-bujur kada kawa ditawar-tawar lagi. Kilir-kiliran banyu mata Aria Basuwanda.



       Watas Barat Astinapura, parak tangah malam. Bulan salau-salau. Kalalawar tarabangan, bahanu-hanu manyimbat dadaunan. Siwara katataguk lamat-lamatan, basasahutan lawan siwara kutang. Santanu mamacul pakaian nang garirapan, baganti lawan baju-salawar hirang. Rambut bauraian manjajak punggung, kapala bajarat lawan timbaran. Salup nang bahias intan diganti lawan tarumpah kulit hadangan batali di landau. Karis Naga Runting nang sudah bakunyung di talaga darah ditangkit di ping-gang. Diwabarata dalam gindungan, butah baisi baju salawar wan amas lantakan basandang di balukuk.

          “ Yayi, Aria Basuwanda, jaga baik-baik Astinapura. Habang hirangnya Astinapura kusarahakan lawan diikam. ”

        “ Lun inggih sandika, kawulunan. Nang kaya apa Astinapura wayah sampian tinggalakan nang kaya itu jua kaina lamun sampian datang. Kadada ubahnya cawali Aria Basuwanda rabah bakuah darah. ” manyahut Aria Basuwanda. “ Ingat-ingat pasan diulun, lamun mamarluakan bantuan Aria Basuwanda sambat ngaran diulun, bisikakan di angin, maka kada balanggar ari Aria Basuwanda ada di hadapan sampian. ”

        “ Iya, Yayi. Ikam ingatakan jua pasanku, jangan aku ditunti, habarku jangan jua dicarii. Lamun aku kalahi kabaratan atanapi katiwasan ada haja aku bakiau, Yayi. ”

            “ Lun inggih, kawulunan. Mudahan lampaian sampian aci dilindungi Sangiyang Sukma Suwara. ”

        Lalu Santanu naik ka atas kuda. Tali kuda dirintak, batis kuda bagarak, bukah manambus malam manyilak ambun, maninggalakan kawasan Astinapura. Dadaunan baguyangan, mangawai mala-pasakan. Ambun nang bagantung batitikan kaya tangis urang ditinggalakan. Bulan basusup ka awan, kada purun malihatakan.

           ndiihh…hiyaiiii
           kait-kait di nagri silan
           apik-apik lamun bajalan

           buah anggur tanggungan samut
           lamun tagugur siapa manyambut
           ngandih…hiyaiiii

        Jadi Santanu susup kampung batamu kam-pung, susup alas mancing alas, manaiki gunung nang tinggi, batajun jurang nang dalam. Limbah batamuan bibinian lagi manyusuwi anak, dijurungai Radin Diwabarata, dicubai banyu susunya. Lamun batamu kampung, ditamui pambakal wan tutuha kampung, minta dikumpulakan bibinian manyusui sambil dijurungi amas lantakan sagan pangalih. Talihat amas lantakan lakas haja pambakal manyuruh urang mamukul kanung mancatuk bandi mangumpulakan sabarapa ada bibinian manyusui di kampungnya. Barandakai bibinian manyusui di halaman rumah pambakal, kada batampik mancuba manyusui Diwabarata. Lagian jua Santanu manjan-jiakan lamun ada nang rasuk banyu susunya, bah, kada bataha lagi musti sugih manggasut karana bakal mandapat amas lantakan satuyuk. Tapi sayangnya baluman ada jua banyu susu nang rasuk. Di kampung subalah kaya itu pulang. Di kampung nang lain damintu jua.

        Lamun mamipit pusat karajaan urang, dikarut ulih Santanu panji Astinapura di turus paring. Talihat panji Astinapura, tatingau tawas urang nang mambawa, lakas haja raja manarima kadatangan Santanu, lakas haja manulusukan kahandak ma-ngumpulakan bibinian manyusui. Tapi Sangiyang Wanang punya mau, Diwa marastuwakan, tatap kada batamuan banyu susu nang rasuk.

             pauh juntaian, anakai, pauh pancukan
             jauh lampaian, anakai, jauh jalanan

             dahan jambu, bauntungai, turus papari
             balum batamu, bauntungai, susu dicari

       Lumus talu bulan bamulaai timbul panala. Lagi kantung kabam lawan duit nyaman haja ma-kan-nginum di lasmin, dibarii sahuang dua huang lakas haja urang mancuba manyusui Diwabarata. Tapi limbah duit habis, amas lantakan daai, barang nang dijual-jual kadada lagi, sakat ha balalu. Napangada tatinggal kamaras urangai lagi. Panala nang lain ada pulang, nang ngaran raja patuh dila-yani saraba disurung-sintaki, wayahini kada tapi taharagu lagi awak wan baju pakaian. Paampihannya, sapapalihan ti marga hati pusang, tamandi atawa tatapas baju haja kada. Baju salawar nang tatinggal salambar di awak bamula carik batambah wawah. Awak kurisaan bakulai paluh bakambuh dabu. Sisingut, jabis, janggut, saraba panjangan. Rambut julalitan manyagar hanau.

        Balalu tahabar sapanjuru matahari pajah: ada urang gila babaju runcang-rancing, bagindungan anak, minta susuiakan; kada tahu itu anak siapa, barangkali haja anak cuntanan; lamun batamuan jangan dipaparaki, kalu-kalu anak saurang nang dicuntannya. Jadi kada kaya paribasa, lamun urang talihat ada lalakian babaju runcang-rancing wan bagindungan anak, lakas urang bajauh, mangiawi kakanakan barataan lalu basintup ka dalam rumah sambil mangancing lawang mangantupi jandila. Jangankan handak manyusuiakan, mambukai la-wang atawa manyahuti kiauan gin kada hakun. Di kampung nang sabuting lain pulang parigalnya. Lamun ada talihat lalakian nang kaya dihabarakan, lakas urang manyambang sambil maacung papang-kung manggatap wan karis-parang bacabut. Nang daur tu banyak nang manjumput batu, lalu manggiha sambil manawaki Parabu Santanu. Tapaksaai Santanu bajauh, maliungi batu nang datang kaya hujan.

        “ Wah... Diwa…Diwa….talanjur purun mala-lakunakan badanku. ” Santanu bapandir saurangan di bawah kayu basar.

        “ Tapi ngaran hudah kuhakuni nasib suratan diri nang digarisakan Sangiyang Sukma Suwara, sajari aku kada bakitar pada cubaan nang ada. Tatap kuturutakan jalan nasibku, kulakuni sampai di mana putingnya. ”

        bangayu manis raga sari
        dimana jua barang dicari
        hiyaaaiii……

       Nang kaya itulah kaadaan Santanu hari ka hari, tarus balalah malingling matahari pajah. La-mun kuda uyuh hanyar inya bacandak, malamarakan awak, banaung di rimbun kakayuan. Lamun ma-ngantuk, hanyar inya bagana, guring batilam da-daunan bakalambu titik ambun. Limbah batamuan sungai anatapi hujan ari hanyar kawa nginum. Bila batamuan buah-buah di hutan hanyar kawa makan. Siang kalawan malam badundang saparau-paraunya mangguringakan anak atawa mambujuki anak supaya ampih manangis.


            hujan balalar, buah hatiai, hujan garimis
            jangan bagusar, buah hatiai, jangan manangis

            latuk dijunjung, caramin mataai, hanau di hulu
            isuk bakunyung, caramin mataai, di danau susu

        Ujar Santanu, lamun kulihatakan nangkaya ini, lamun aku balamah tatarusan, kada bakalan hampai maksud di hati. Cuba pikir, limbah digiha urang bajauh aku, limbah ditawaki urang balari aku, kada cagaran tadapat banyu susu padahal Diwabarata sudah kurus karing nangkaya diisap buyu, jaka kadada kulimbit hudah bacarai tulang. Bursiahalah di kampung nang aku ditawaki urang tu ada banyu susu nang rasuk maka bapanyasalan aku saumur hidup. Jadi supaya jangan baasanan jangan bapa-nyasalan, mulai ari ini hakun kada hakun urang tatap kusuruh manyusui Diwabarata. Hakun urang, batarimakasih aku. Kada hakun urang, kupaksa hampai hakun. Bulat hati Santanu malangkahi jalan bakakarasan. Bakal jadi habu atanapi jadi harang itu urusan kaina, ada haja habarnya ada haja lalakun-nya. Maka digihanya kuda, laju maninggal dabu.

        Santanu manjuhut tali kuda. Kuda maringkik sambil maangkat batis hadapan, basatup di parak lawang sakiping kampung. Di lawang sakiping tu manyambang lawian lalakian, rata-rata bapingkutan gagaman. Ada nang bacakut tumbak. Ada nang ma-ingkut parang bungkul. Ada nang mangganggam karis. Santanu turun pada kuda, bajalan mamaraki. Baya diparaki tu kadangaran bunyi mandarusut, bunyi parang dicabut bunyi karis didahut. Santanu mamisiti bahalai gindungan Diwabarata lalu manangkupakan tangan di dada, mambari hurmat.

        “ Dangsanak, muhun paramisi masuk ka kampung. ” ujar Santanu.

        “ Kada bulih masuk ka kampung kami. Lakas babulik ikam. ” ujar nang pamukaan. Amun kada pambakal musti urang tu nang pawaninya di kam-pung.

      “ Aku kada cagar manyinghara urang. Aku cuma minta susuiakan anak. Lamun ada banyu susu nang rasuk lawan anakku maka kaina kuatari amas batungkah….” Galahakan urang barataan mandangar pandir Santanu.

        “ Dasar urang gila! ” saikung baucap. “ Diri saurang haja kada ruus maka handak mambari urang amas batungkah. ”

        “ Aku kada gila, kada jua bakaramput. Aku ini Santanu, Raja Astinapura. ”

        Makinnya urang tatawaan mandangar Santanu mangaku raja, sadikit kada mambadai lawan kaluung.

        “ Tahuai kami pada ikam ni raja, raja urang gila! ”

     “ Aku babanaran raja, ini buktinya…” Santanu maungkai panji Astinapura. Nang ngaran siang-malam di awak babulan-bulan ari maka panji Astinapura tu kalihatan pinda marigat. Siapang nang parcaya.

        “ Rajakah ikam ni, kada raja ti makinnya ai, lakas bajauh pada kampung kami! ”

        “ Dangsanak, tulung maklumi aku…”

      “ Hudah! Jangan banyak pandir lagi kita, tutui ranai, hukumakan, habis surah! ” nang lain basiwara malangati kakawanannya.

        “ Jangan, dangsanak…”

      “ Bajauhkah, kadakah? Lamun kada bajauh ramak ikam kada bataha! ” ujar pambakal sambil balangkah ka hadapan Santanu, manggarak-garaka-kan parang hanyar kiliran.

       “ Jangan, dangsanak. Kasiani kami, tulung susuiakan anakku. Lamun kaina kadada banyu susu nang rasuk, kada sarana disuruh musti aku bajauh….”

Sasahutan pandiran Santanu datang barupa sipakan. Santanu baundur salangkah. Datang pulang sipakan. Baundur pulang Santanu.

        “ Jangan, dangsanak, kasiam jangan…”

        Pambakal tu kada hakun bapandir lagi, langsung manarajang sambil mailai parang. Santanu basingkir tapi timpasan datang batantan. Sadang hudah aku basabar, ujar Santanu dalam hati. Lalu inya barandah awak malaluakan parang di atas kapala, diayunnya tangan ditamparnya pambakal. Paauuu! Habang pipilingan, tajarunjung ka balakang. Malihat pambakal kana tampar manyasahai nang lain. Santanu kada bakitar. Timpasan-sudukan-tumbakan ditangkisi disingkirakan, dibalas lawan tamparan-sipakan. Gagaman nang balawi tu jangan mahayut awak mahayut hujung baju Santanu haja kada. Nang ada parang-karis-tumbak tarabangan, mandabuk ka tanah lawan urang-urangnya. Untung haja Santanu kada baniat mamatii hingga baarit wayah manampar manyipak, jaka kada kaya itu banyak tu pang nang balu manggasut. Itu gin banyak nang balingsar di tanah kasakitan. Ada nang mantukung dahi bangkak pipilingan kaya bakas disangat bapuluh laning. Ada nang patah tulang hidung, bibir pacah, dua-talu bilah gigi patah. Ada nang tasulisih wihang cikak rapun gulu. Ada nang rimbah bahu, ada nang baurut tuut baurut parut. Kalimbantaian ingis-ingis wan hingak-hingak.

        “ Ayu, tulung kumpulakan bibinian manyusui….” ujar Santanu sambil baduduk di palatar.

        Ujar pambakal, lamun kada kuturuti kahandak urang gila ni bisa balu manggasut bini anumku, maka bini anumku tu lagi rarangkaannya baluruh kalambu mambawai guring balakas. (Napang bulan tadi balum ganap patang puluh hari bini baranak, pambakal tu sudah manaiki jandila anak urang; nang ngaran pambakal pawaninya ha pulang di kampung kadadaham urang nang wani tumbur, jadi tapaksaai urang mangawinakan.)

       “ Hayu humanya, humpulakan hahawanan harataan. ”ujar pambakal sambil bagamat bapuat, bunyi mingsang baucap, napang tulang hidung pukah, darah nang hintadi mumui di sisingut wan muntung bamula karing, bajarikit bacampur tanah, jadi muntung takurambit.

        “ Hadahakan hawan huhuhannya tu handak haamal hanyu susuah handak haluah….”

        Bini tuha pambakal tu bakas katakutanan jua malihat urang kalahi, lintuhut asa lamah bakas malihat darah, jadi lambatai inya bajalan, pinda bainggang ha.

       “ Naah, hahalambat hinya. ” pambakal managur. “ Jangan hajalan haya japun. ”

        “ Ulun lamah lintuhut lagi…” sahut nang bini.

      “ Naah, hahandir hulang, halu haina husumpali huntung tu lawan huhuduh! ” sarik pambakal. Mahantak batis ka tanah, manggiha bini. Kada malihat di tanah tu ada batu barijing. Takuciakai inya napang tumbal badarahan, sakit pada disuntul urang.
Katakutanankah pambakal tu, kapintarankah inya, kabubungulankah manusianya, wayah malihat pamarum muha Santanu marung karana kadada banyu susu nang rasuk lawan Diwabarata, kaputingannya bibinian nang bujang lawan nang ampih hait disurung jua. Kaya maulu-ulu. Pau! Pau! Dilatuinya ulih Santanu, balaluai pambakal bakusur di tanah nangkaya kakanakan kada ditukarakan gulali, manggarung tangis malihat talu bilah gigi tadakai di dabu.

       Baluncat Santanu ka atas kuda, maninggalakan kampung. Di hujung kampung, di pinggir sungai, badapat lawan lalakian-bibinian nang pinda katakutanan di bawah pisang.

        “ Adalah talihat bibinian manyusui di parak sini? ” Santanu batakun.

        “ Kadada…” nang lalakian lakas manyahut.

        “ Bujur kadada? ”

        “ Inggih, kadada tu pang! ”

        Santanu hudah handak bajalan wayah kadangaran tangis kakanakan matan bawah rumbia. Ditingau ulih Santanu, lakas si bibinian bukah ka bawah rumbia. Sakalinya anak nang dihaja habang disimpani di situ, habis dihurung samut gatal. Turun Santanu pada kuda, lakas si lalakian baluncat ka jukung langsung mancabut parang. Diitihi ulih Santanu lalakian tu nahap pang, tinggi basar ganal pagalangan. Ujar Santanu, cagar bakalahi pulang aku ni. Si lalakian tu mailai ka parang, manimpas ka tali jukung lalu maambil pananjak, batanjak ka tangah sungai.

        “ Uiii, urang gila! Ikam tahulah siapa aku ni ….” si lalakian bakuciak matan tangah sungai. “ Aku ni anak aruah bapa nang panyabarnya, tahulah!. Jaka aku kada nang panyabarnya tahu rasa ikam urang gilaai! ” ujarnya sambil maayun parang manimpasi angin. “ Cak! Cak! Jaku! Punggal tangan! Cak! Cak! Jaku! Punggal batis! Ayu, urang gila, lamun hudah kada babatis kada batangan kawalah lagi ikam maanu urang! ”

        “ Baigut, bungulai! ” ujar Santanu kamu-muaran. Jaka inya baisian kakatikan musti dika-tiknya urang tu. Jadi mulai ari itu tapulatik habar balalar pamandiran: ada urang gila amuk; lamun urang kada hakun manyusui anaknya surumahan tu pang dipu-kulinya; sakampungan kada hakun, sakampungan tu pang dihukumakannya; lamun malawan musti ka-puhunan, napang ada nang dilincainya nangkaya urang maiirik banih, ada nang dibairnya sapanjang lurung nang kaya urang manjuhut upih, ada nang disipakinya ka sana ka mari kaya urang basipak raga, ada nang dilapaunya batantan nang kaya urang manggual tukil. (Maka ujar Kaka Sarbai, Santanu tu taguh karung-karung. Disuduk ditimpas kada tadas. Dipanah ditumbak kada balibak. Dipangkung lawan kayu bapangkih maanjul. Ditangkap dirimpung lapas tarus karana baiisian kajian walut putih.)



        Alalia! Kaadaan Parabu Santanu amuk sapanjang jalan ampah matahari pajah kada dicaritaakan. Tacarita urang di Nagara Wirata. Siapa nang mundak jumanang nata marang niki nagara, masa dua-talu nang bangaran Parabu Basukati, didampingi parmaisurinya Diwi Yukti.

        Parabu Basu-kati baiisian dua ikung anak, bini-bini lawan laki-laki. Anak nang tuha tu bini-bini, bangaran Diwi Durgandini. Anak nang anum lalakian, bangaran Bangbang Durgandana. Manurut di dalam caritanya, ibarat langit, Nagara Wirata lagi dalam kaadaan muru. Parabu Basukati sakaluwarga lagi dirundung lara bakapan-jangan. Jadi nang ngaran raja sakulawarga lagi sa-dih, saluruh hamba rakyat taumpat sadih. Lamun ditakunakan napa garang nang jadi pungkalanya maka urang manjawab lara bakapanjangan tu basumbar di diri Diwi Durgandini. Lamun disusuri pulang nangapa garang maka Diwi Durgandini sum-barnya maka urang manyahut Diwi Durgandini tu nangkaya kambang halalang di tangah padang. Nangapa maka disambat nangkaya kambang hala-lang di tangah padang maka sasahutannya karana Diwi Durgandini bagus dipandang matan jauh tapi saikung-ikung kadada nang handak mamutik lalu maandak dalam jambangan.

        Ujar urang, jangan handak mamutik, baparak gin urang kada hakun. Ujar nang lain, jangan marika manusia, bubuhan urang halus atawa jin parimambang gin kada hakun mama-raki. Bahari, ujar urang, Diwi Durgandini tu jadi kambang rabutan anak raja-raja. Muha langkar, awak mamputun, baik kalakuan lamah limambut tutur basa. Lamun digambarakan mamakai paribasa anak nagri, Diwi Durgandini tu dahulu nangkaya ininah:

        rambut ikal mayang bajuntai hampai ka batang paha,
        dahi nipis bulan sahiris,
        kaning kaya kumbang banaung,
        bulu mata lantik tampayan,
        mata galak bintang sumarak,
        pipi nangkaya pauh dila-yang,
        hidung mancung mangudup malur,
        bibir nipis nangkaya karatas digunting,
        dagu kaya awan bagan-tung,
        gulu nangkaya tangkai kambang matahari,
        bahu bidang sampiran,
        pinggang ramping sakacap malang,
        batis nangkaya batis bilalang,
        talur batisnya putih pandan sasalungsung,
        tumitnya putih bawang sasihung.

        taluk buntar kuliling binting,
        pudak malati kambang kuwini,
        tuhuk taputar tapusing-pusing,
        kada manyama Diwi Durgandini.

        Tapi suatu hari, Sangiyang Wanang punya mau Diwa marastuakan, hinggap panyakit di diri Diwi Durgandini. Nangkaya apa garang panyakitnya? Tumbuh kuring, buruk saawakan. Pukunya, ta-tinggal muha haja lagi nang baik, nang lainnya kaya daging buruk. Nang ngarannya kuring, nanah bani-nisan hulat kalatikan lalat bagarumbungan. Bau haruk manyangat hidung, sapuluh dapa kaciuman hampisnya. Lamun baparak pitung dapa, parut urang maula-ula karana saluruh isi parut minta dimu-akakan. Baparak lima dapa, lamun kada siup musti muntung jalujukan kadap panjanak karana mata kunang-kunangan.

     Habis hudah sagala tabib sagala dudukun tapi itu panyakit kada jua hilang. Daai hudah tatamba mananamba, kasai mangasai atanapi lungsur-malungsur, panyakit kada jua ampih. Bapuluh gum-bang banyu tawar bubuhan bagawan dikinum dimandiakan tatap kada waras. Lalu Diwi Durgandini diasingakan, diulahakan mahligai saratus dapa pada kadatun Wirata. Di situ inya hidup saurangan karana kadada amban nang tahan malayani. Lamun hampai wayah makan, datang amban mambawa makanan, diandak pitung walas dapa pada mahligai.

        Tajujumpipir han kasian Durgandini manjumput makanan lalu mambawanya ka mahligai, napang bajalan asa rait, kulibir kuring tabilak, darah wan nanah balilihan. Sanja ari, duduk inya di palatar sambil mamicik kuring mambuangi hulat di awak tapi baisukannya kalatikan pulang hulat tu. Dibuangi baisukan kalatikan sanja. Dibuangi malam kalatikan siang.



     “ Wah…Diwa…Diwa…. Purun banar manurihakan rajah tangan nangkaya ini ka alah diaku. Jakanya tuh dihinamakanai ka diri saurang….tahu tu rasanya kaya apa manyandang panyakit nang kaya nia. ” Durgandini bapandir saurangan sambil ngisuk-ngisuk manangis.

        “ Rasa-nya aku hampir kada tasandang lagi. Jaka pang kada ingat lawan dusa hudaham kucucukakan lading ka parut. Mati ranai, nyaman ampih aku maarit….”

        Kaya itulah Durgandini siang ka lawan malam. Kawan di mahligai cuma sabuting suling. Tangis di hati disiwaraakan ka dalam suling, mailun dibawa angin. Lamun suling mailun siang, kupu-kupu nang lagi maisap madu di kambang saputar mahligai lakas tarabangan, kada tahan mandangar ilun suling; kasisiur, kumbang, bilalang, lakas jua bajauhan. Lamun suling mailun malam, jangkrik kada babunyi katutupi mamagut sunyi.

            bangayu manis raga dalu
            sudah nasibnya untung badanku
            hiyaiii……

    Malam maurak halar. Bulan tanduk baka-yakat di langit, bahanu bacangul bahanu basintup ka dalam awan. Bintang-mambintang damintu jua, bahanu batimbul bahanu bagilup. Lampu-lampu kadatun Wirata pada banyalaan, cuma sacacaru-nungnya lampu tatap kada kawa mancarunungani pangrasa urang kadatun Wirata. Dua talu ikung kasisiur malam basasahan, hinggap-tarabang saputar balai panghadapan. Dua talu ikung urup tarabangan, manyimbat-nyimbat cahaya lampu. Lalu kasisiur wan urup tu lakas bajauh wayah lamat-lamatan kadangaran ilun suling Durgandini.

      Di balai panghadapan, Parabu Basukati linggih-linggih di kursi kaamasan, linggih-linggih saking dadampar kancana, bapayung babar kait landian amas landian intan, dinayap ulih Bagawan Iswara. Ujar kita, Parabu Basukati duduk di kursi kaamasan, duduk di atas dadampar kancana, bapa-yung babar kait bahias amas bahias intan, dihadap ulih Bagawan Iswara. Ini Bagawan Iswara tabilang urang nang hawas paningal, didatangakan matan Paratapan Ambar Katawang, jauh di hujung Nagara Wirata. Ujar Parabu Basukati, lamun bagawan nang saikung ni kada kawa jua mananambai atawa kada baulih pitua, maka sapanjang masa kada bakalan ampih panyakit anakku. Jadi malam itu saluruh harapan urang kadatun Wirata ditumpahakan ka alah Bagawan Iswara.

        “ Paman Bagawan Iswara, rasanya anak ingsun kada tasandang lagi panyakitnya. Ayu, ungkai samuaan ilmu andika, satitik jangan disisaakan. ”

      “ Kanjang Parabu, lamun sagala macam tatamba hudah kada mambari bakas maka cara nang pawakasan tinggal kita mambuka patikala. ”

        “ Mambuka patikala? ”

        “ Iya, Kanjang Parabu, kita mambuka patikala. Cuma lamun patikala hudah dibuka lalu kadada pitua apa-apa maka kada balanggar ari habis umur anak sampian. ”

        Bakarucut dahi Parabu Basukati, manim-bang-nimbang putusan. Siim balai panghadapan. Nang ada cuma siwara angin mambawa ilun suling, ilun nang tarasa manggirik ka hati. Ujar Parabu Basukati, bapatah bilah ranai aku. Bukan aku kada sayang lawan anak tapi rasa sayang itulah nang maulah bapatah bilah. Putusanku ni nangkaya urang pamainan: lamun manang baarti ada jalan mana-nambai anakku, tapi lamun kalah ampih anakku manyandang lara bakapanjangan; jadi tasarah nasib haja lagi kamana maampahakan, waras anakku atanapi pindah atmani marang raga.

        “ Paman Bagawan, nang ngaran kita ni baihtiar, ayu kita habisakan ihtiarnya. Lamun ihtiar kita hudah habis, ingsun rilaakan Durgandini, mudahan inya masuk ka surga wayang….” Ujar Basukati sambil marasaakan rinyut hati nang rasa diramas-ramas.

        Putusan hudah diucapakan. Bagawan Iswara maungkai patikala. Ini patikala ampun Bagawan Iswara lamun dipuja sambil dibacaakan isim-isim kawa manimbulakan bilangan baisi pitua atanapi cara mamacah sagala macam pakara. Jadi balalu patikala dipuja, dibacaakan isim-isim :

            “ Agung-agung nang maahura
            agung-agung nang maahuri
            minta ampun minta sapura
            banyak-banyak kami diampuni
            kami datang basangu saru
            kami datang basangu pinta
            ayu, pitua barii jalan tunjuki
            supaya ampih panyakit Durgandini…”



        Babuka patikala. Bajanguk Bagawan Iswara. Muntung kakarimut kaya mambaca tulisan di dalam patikala. Limbah tuntung patikala lakas dikantup lalu disimpani.

        “ Paman Bagawan Iswara, ada alah ubat gasan panyakit anak ingsun? ”

        “ Kadada pang takisah ubat, “ ujar Bagawan Iswara. “ Cuma ada pitunjuk nang muga-muga kawa maampihi panyakit. ”

        “ Dimapa, Paman? ”

        “Anakmas Durgandini disuruh babuat kabaikan lawan diurang. ”

        “ Caranya badimapa? ”

    “ Manjadi tukang kayuh jukung di Sungai Simpai Bagalung. Jadi lamun ada urang handak manyubarang, atarakan kasubarang. Kada bulih baindah, kada bulih manarima pangalih. Nang malamkah nang siangkah, surutkah banyu baahkah sungai, lamun ada urang handak manyubarang harus disubarangakan. Diunjuki urang duitkah, ditinggali urang barang nang kaya gunungkah, kada bulih ditarima. “

          Mandam pulang Parabu Basukati. Sungai Simpai Bagalung tu jauh di watas Nagara Wirata. Sungai tu sungai ganal, dalam banyunya, landas arusnya, barandak gusungnya, banyak ulaknya. Cucuk lawan ngaran. Mun tahiut ampah ka ulak, jangan baya jukung atanapi kapal rapun kayu nangkaya garuha gin langlam.

        “ Paman Bagawan, Durgandini tu kada bisa bakayuh kada bisa mangamudiakan jukung. Mandi bakunyung di sungai gin sakali samustawa, wayah inya kakanakanam pulang. Jadi lamun disuruh mangayuh jukung manyubarangakan urang kalu kaina mambawa panala lawan diurang. Tabalik jukung papariannya, mati lamas urang, sakat tanggung jawabnya. ”

          “ Sual mangayuh wan mangamudiakan jukung itu sual gampang. Kaina ingsun mambari banyu tawar. Lamun dimandiakan dikinumakan langsung inya bisa mangayuh wan mangamudi jukung. ”

        “ Ada jalan ngarannya, Paman. Cuma sabuting lagi, Durgandini tu babau haruk, urang nang baduduk di jukung musti siup mancium. ”

       “ Kaina ingsun bari daun barajah. Lamun daun tu dimakan maka dalam sahari dua bakal bakurang haruknya. Mun maampihi haruk kada, cuma kada cagar siup urang duduk sajukung. ”

        Jadi pitua patikala dituruti. Dimandiakan dikinumakan banyu tawar ka alah Durgandini. Dimakanakan daun barajah. (Daun nangapa aku kada tahu jua. Halus haja daunnya, pinggirnya barijing-rijing, balangnya kuning bapuritik hijau, uratnya banyak balingkuk di tangah. Lamun dimamah, ujar ti rasanya saling kalatan, bakali-lipat dibanding panawar sampai. Tahahang tu pang muntung, ricus-ricus baludah mambuang sisa pahit di ilat.) Dua hari imbah mamakan daun tu jauh bakurang bau haruk awak Durgandini, mun dudua dapa kawa hudah urang mamaraki. Durgandini bapipit ka tawing halat wayah Parabu Basukati cangul di lawang mahligai. Takutan inya kalu kawitan siup mancium haruk awaknya.

        “ Anakmas Diwi Durgandini….” Parabu Basukati mangiau sambil duduk parak jandila.

      “ Inggih, ulun pun. Pinarak atur ulun jumantang wantan marang arapan sampian, Kanjang Rama. ” Durgandini maatur sambah di hadapan kawitan. “ Muga-muga sampian aci dalam lindungan Sangiyang Sukma Suwara, kawulunan….”

        “ Yaah, Anakmas. Bakti ikam kutanam dalam badan, kusimpan dalam hati. Muga-muga mandapat balasan Sangiyang Sukma Suwara. ”

        “ Inggih, karsa sampian kaya ngandi? Napa kahandak sampian mandatangi diulun, Kanjang Rama? ”

        “ Banyak nang handak kupandir lawan ikam. Ayu baparak supaya aku bapandir jangan kaya bakuciak.”

        “ Jangan, Kanjang Rama, awak ulun babau….” tampik Durgandini, sadar lawan kaadaan dirinya. Duduk pitung dapa pada kawitan ni gin inya gair.

        “ Uuu, kada, Anakmas. Barangkali ikam balum manyadari kalu imbah mamakan daun rajahan Paman Bagawan Iswara tu bau ikam jauh bakurang. ”

        “ Bujurankah, Kanjang Rama? ”

        “ Masa Kanjang Rama bakaramput. Ayu, baparak ampat lima dapa….”

        “ Inggih, napaapa ujar sampian, kawulunan. ”

        Bagimit baisut Durgandini mamaraki kawitan. Tinggal talu dapa lagi baduduk batalimpuh inya. Ditingau ulih Durgandini pamarum muha kawitan, diitihinya pinda kada ilui-ilui taparak diinya; baarti dasar babanaran bau awaknya jauh bakurang; bapulatik rasa gumbira di muha Durgandini. Bagalumbang pangrasa Parabu Basukati maitihi di muha anaknya bapuratik balang gumbira. Umai, ujar Basukati, mudahan lakas ampih panyakit anakku sahingga balang muhanya ampih nangkaya malam kada babulan kada babintang.

        “ Naahh, kada bakaramput kalu aku? ” ujar Basukati sambil lihum ka alah Durgandini.

     “ Inggih, ulun banyak-banyak batarima kasih lawan Niang Bagawan Iswara. ” sahut Durgandini. “ Napa nang handak sampian pandir, Kanjang Rama? ”

        “ Pamandiranku ni samunyaan bakait lawan ikam, bakait lawan cara maampihi panyakit ikam. Jadi dangari baik-baik. ”

        “ Inggih, ulun dangari. Lamun sampian balum tuntung bapandir, sajari kada bakitar Durgandini pada hadapan sampian. ”

       “ Yaah, mimang damintu adat anak lawan kawitan. Wayahini banyak hudah adat kakanak nang kada baik lawan kawitan. Sabatik kawitan baucap bapuluh batik inya manyahuti. Kada kawa dihiras sahama-hama. Ada jua dipadahi babirangutan muha nangkaya balik lipap, bakusur batis lalu mancicing maninggalakan. ”

        “ Masa Durgandini kaya itu, Kanjang Rama. Jaka kadada sampian, kadada kasih sayang kawitan, masa Durgandini ada di marcapada bumi lamah. Ganal gunung ganal lagi hati diulun sagan mandangari papadah sampian. ”

        “ Yaah, Anakmas. Himung aku mandangar ikam hampai bapikir ka situ. ”

Durgandini lihum mandangar pujian ka-witan. Nyaman han hati Basukati malihat lihum cangul di bibir anak. Napang bilang mawalung bu-lan nang ngarannya lihum Durgandini tu langlam, jadi sakali lihum kalihatan nangkaya karantika sumarak. Lalu Basukati mangisahakan pitua bi-langan nang datang matan patikala.

        “ Anakmas, dalam hidup ni kita parlu baihtiar, sahabis-habis ihtiar. Lamun habis hudah ihtiar balum hampai jua nang dikahandaki maka itu hanyar nasib ngarannya, suratan takdir Sangiyang Sukma Suwara. ”

        “ Inggih, ulun mangarti. ”sahut Durgandini. “ Jadi ulun harus mangayuh jukung manyubarangakan urang di Sungai Simpai Bagalung. ”

        “ Mimang macam itu. Ayu baiisi kasanggupan kada ikam? Handak ampih bapa-nyakitan kada ikam? ”

        “ Lun inggih sandika. Napaapa ujar sampian dijunjung di atas batu kapala Durgandini. Samayu-mayu badan ulun jalani, Kanjang Rama…. ”

        “ Bagus, Anakmas. Bahara barakat kita baihtiar, barakat kita ihlas manurutakan kahandak Sangiyang Sukma Suwara, tang waras ha panyakit ikam. Tanam dalam hati ikam, lamun Sangiyang Sukma Suwara tu bakahandak, balum bakijip mata kita hudah jadi kahandak-Nya. ”



       Alalia! Balalu diganaakan Durgandini di pinggir Sungai Simpai Bagalung, di hujung banua parak watas Nagara Wirata. Diulahakan punduk, diadaakan jukung, disadiakan sagala macam kapar-luan. Supaya jangan kapinanduan urang, kapala Durgandini batukup tanggui, babaju basalawar gubur; muha balilit lawan sulindang, tatinggal mata haja lagi nang kalihatan.

        Jadi, kada tahu siang kada tahu malam, kada tahu hujan kada tahu panas, lamun ada urang handak manyubarang bakayuh Durgandini, mamacah arus maliung ulak Sungai Simpai Bagalung. Maka nang ngaran manyubarang kada babayaran banyakai lalu urang datang. Lagian karana kada batampik ari, manyubuh ada hudah nang bakiau; tangah malam ti hudahnya, kada tahu Durgandini lagi guring digandah lawang. (Wayah musim baputik limau, Agus tuh rancak manggandah. Tinggalam parak jukung, napang dibuati talu kampil baiisi limau. Wayah musim katam, Jarkasi nang manggandah. Lakasi subarangakan aku, ujar, aku handak maatari mintuha baras hanyar. Bah, liwar kapupurunan.)

              ndiihhh hiyai…..
              rapun kuwini, wayahini bagus, batali
              kalaras
              alakun diri, wayahini bagus, mambari
              maras
 
              kamana jua, kasian banar, rapai buahnya
              pabila jua, kasian banar, hampai
              hinggannya
              ngandih hiyaiiii……

        Alaiia! Pagat kisah timbul carita. Tacarita urang lagi mamuja samidi di paratapan Wukir Ratawu. Ini paratapan Wukir Ratawu andaknya di kawasan Sapta Arga. Sapta itu pitu. Arga itu gunung. Kawasan Gunung Pitu. Dingarani Gunung Pitu karana di situ dasar ada pitung buah gunung. Tiap gunung lain-lain, kada sama kaadaan alamnya. Asa, Gunung Marawu, ini gunung nang di dalam parutnya manyimpan api. Dua, Gunung Parimana, ini gunung nang subur tanahnya; di sini bahari wadah patapaan Bagawan Manumayasa. Talu, Gunung Sarangan, ini gunung batu; di gunung ini bahari wadah patapaan Bagawan Sakutram, anak Bagawan Manumayasa. Ampat, Gunung Candi, ini gunung nang wingit; ujar kita gunung nang didiami ulih bubuhan jin parimambang; di sini dahulu wadah patapaan Bagawan Sakri, anak Bagawan Sakutram. Lima, Gunung Ringga, ini gunung nang bagus pa-mandangan alamnya. Anam, Gunung Sarungga, ini gunung nang bahutan labat sahingga bilang kada masuk cahaya matahari. Pitu, Gunung Wukir Ratawu. Ini gunung nang ada talaganya. Banyu talaganya babalang nang kaya balahindang.

        Siapa nang lagi mamuja samidi di Paratapan Wukir Ratawu, masa dua-talu nang bangaran Bangbang Pulasara. Ini Bangbang Pulasara anak ulih Bagawan Sakri, cucu Bagawan Sakutram, buyut Bagawan Manumayasa. Turun-timurun urang Sapta Arga dibari kalabihan ulih Sangiyang Sukma Suwara: hawas paningal, dalam ilmunya, banyak kajiannya, kawa bapandir lawan sagala mahluk marcapada bumi lamah.

         Sahari sabalum mulai batapa Pulasara mandi di talaga, mambarasihi diri mambarasihi pangrasa. Sambil barandam di talaga inya ingat kisah juriat bahari, kisah wayah kainya, Bagawan Sakutram, ditianakan. Wayah itu Diwi Kaniraras, bini Baga-wan Manumayasa, mangidam buah sumurwalia nang tumbuh bagampir di atas rapun rukam. (Nang kaya apakah buahnya aku kada tahu jua. Ujar Ka Ruslan buahnya tu halus haja, kulitnya kuning kaya amas, isinya bahapat-hapat kaya manggis. Bana-rankah. Cuma sidin mamadahakan sambil tatawa pang, kira-kira ti tabanyak karadaunya.) Siapa nang darahnya bacampur lawan buah sumurwalia sudah ditakdirakan bakal manurunakan raja-raja basar.

        Tulak Bagawan Manumayasa ka hutan Wanasaya. Sakalinya buah sumurwalia tu dijaga ulih Jin Sakutapa. Di parak rapun rukam batuyuk nang kaya gunung tulang-bilulang manusia. Rupanya banyak hudah urang nang handak maambil buah tu tapi maatar umur banar haja, habis dipukah-pukah lalu dibantas ulih Jin Sakutapa. Talu hari talu malam Bagawan Manumayasa bakalahi hanyar kawa mambunuh Jin Sakutapa. Rukam dinaiki, buah sumurwalia diambil, dimakan ulih Diwi Kaniraras. Lahir anak lalakian, dibari ngaran Bangbang Sakutram. Itu ngaran diambil sagan maingatakan kajadian wayah bakalahi lawan Jin Sakutapa di bawah rapun rukam.



        Ujar Pulasara, hampai ka aku hudah balum ada tanda-tanda bakal manurunakan raja-raja basar. Jadi aku batapa ni bukan manuntut janji tapi sahibar handak tahu pada katurunan nang kabarapa garang kaina nang jadi raja basar tu bamula. Lamun aku kada mandapat pitunjuk kada ampih aku batapa.

       Kaluar pada talaga, Pulasara masuk ka dalam guha, duduk basila, maatur pahinakan hampai mancapai ruang puang. Bamacam-macam gudaan dilalui, mulai tadung ganal nang malilit awak manungap kapala, macan nang mangarukut maigut gulu, jin nang malincai mamukah awak, sampai pitu bidadari kayangan nang baulit siang kalawan malam. Tapi Pulasara tatap kada bangun tatap kada bagarak. Kalawasan inya batapa, kalalawasan kada bagarak, awak dililit bilaran, rambut jadi sarang burung. Burung bahintaluan. Hintalu pacah, cungul saikung anak.

        Kakuatan tapa Pulasara maulah hawa Wukir Ratawu manjadi panas bakali lipat. Rurumputan karing, dadaunan layu. Binatang-binatang hutan tumbur, bukahan saparundutan, baugah maning-galakan Wukir Ratawu. Balalu timbul gara-gara di Junggring Salaka, banua bubuhan diwa. Balai Gant-ung Angin kaya dilimbung, lawang Salamatangkap garabauan babuka-kantup saurang, kawah Chandra-dimuka bagulak, kuciakan sagala macam binatang paliharaan, kuhumapan bidadari kayangan.

        “ Katiwasan Adi Guru! Katiwasan! ” Sangi-yang Aji Narada gagarunum sambil badadas masuk ka kadatun Kuta Miring Kayangan. Di atas dadampar kancana, bakarucut dahi Sangiyang Jagat Nata. Diwa batangan ampat nang bagalar Paramasti Guru Diwa Alam tu manyapui paluh nang lilih ka mata.

        “ Katiwasan, Adi Guru! Kada kawa diliatakan! ” ujar Sangiyang Aji Narada.

         “ Iya, Kakang Aji Narada. Lamun diliatakan bakal guncang kasatimbangan jagat pawayangan. ” sahut Paramasti Guru Diwa Alam.

        “ Jadi dimapa kita? ”

        “ Kita turunan ka marcapada, manggarak Pulasara sambil manuntun inya ka jalan nang dikahandakinya. ”

        “ Jadi kahandaknya ditulusakan, Adi Guru? ”

        “ Satangah ditulusakan. ”

        “ Maksudnya macam mana? ”

    “ Satangah ditulusakan karana waktunya sagan manulusakan baluman hampai. Panjang baki-luk-kiluk lagi jalan takdir Sangiyang Sukma Suwara nang harus dijalani ulih Pulasara. Jadi kita cuma kawa maampahakan ka muhara jalan. ”

        “ Lamun damintu lakas kita turunan, Adi Guru….”

        “ Iya, Kakang, turunan kita. ”

Paramasti Guru Diwa Alam lawan Sangiyang Aji Narada sigra maninggalakan Kuta Miring Kayangan, turun ka marcapada bumi lamah, mami-pit paratapan Wukir Ratawu. Paramasti Guru Diwa Alam basurup ka indung burung, Sangiyang Aji Narada basurup ka anak burung. Malam ari, lamat-lamatan Pulasara man-dangar indung burung lawan nang anak bariristaan di dalam sarang.

        “ Waah, Diwa, Diwa, lamun tatarusan kaya ini bakal mati jua kami di sini. ” ujar indung burung sambil basisigan.

        “ Iyaam, ulun hudah kada tahan lagi, rasa dijarang siang kalawan malam. ”anak burung manyahut.

        “ Marga gawian manusia nang saikung ni haja habis hudah binatang barataan baugah pada Wukir Ratawu. Tatinggal kita haja lagi, Anakai. ”

        “ Napa maka kita kada umpat baugah, Ma? ” anak burung batakun.

      “ Handak banar aku baugah tapi kada badaya. Ikam nih, Anakai, nang kupikirakan. Ikam balum bisa lagi tarabang, samantara aku kada kawa maanggung diikam. ”

        “ Lamun kaya itu daripada kita mati badudua baik ulun haja nang mati. Jadi lakas sampian baugah, tinggalakan haja ulun….”

        “ Aku kada pacang baugah lamun kada lawan diikam. ”

        “ Jangan, Maai. Kaina kadada nang mangisahakan kalu manusia nang batapa ni sama sakali kada baparasaan, kadada maras kasian lawan mahluk marcapada. ”

        “ Iyaam, Anakai, Pulasara ni tamasuk juriat bagawan nang salah didikan. Urang nang sudah dibutaakan ulih kahandak, kada parcaya lawan kabijaksanaan Sangiyang Sukma Suwara. Manusia nang kaya itu maka handak manurunakan raja-raja basar, kada mambadai lawan kaluung. Bagawan Sakri bahari kada kaya inya ni kalakuan, hakun manulung urang, mangganti diurang jadi makanan raksasa. Bagawan Sakutram hakun manulungi diwa-diwa batara-batara wayah Kuta Miring Kayangan digampur urang. Bagawan Manumayasa kaya itu jua, titik darah malabuni kalahi di Junggring Salaka. Panyawaan tu nang ditaruhakan. Nang saikung ni makaam kada kawa dihiras-hiras. ”

        “ Itu marganya kanapa sampian harus hidup. ” ujar anak burung. “ Sampian kisahakan lawan burung-burung barataan nang kaya apa sabujurnya pahatian Pulasara. Bawai burung-burung mamuhun lawan Sangiyang Sukma Suwara supaya mamagati janji cagar manurunakan raja-raja basar. ”

        “ Lamun kaya itu isuk kutinggalakan ikam. Nasib ikam kusarahakan lawan kahandak Sangiyang Sukma Suwara. ”

     “ Jangan batunda ari lagi, damini jua sampian tarabang, kalu pinda isuk panas batambah hingga sampian kada kawa manggarakan halar. ” Batatangisan indung burung lawan nang anak.

       “ Lamun ikam bauntung kawa hidup, carii aku di atas rapun kariwaya di subarang Sungai Simpai Bagalung. “ indung burung manciumi nang anak lalu tarabang maninggalakan. Tatinggal anak burung, ngisuk-ngisuk manangis sambil gagarunum saurangan.

        “ Wah…Diwa…Diwa, kaya inilah nasib diriku. Hanyar barapa hari malihat alam tarang sudah jadi kajajakan urang dalam mancapai tujuan. Tapi aku tahu, Sangiyang Wanang kada jalim, mudahan kaina anak cucu Pulasara banasib nang sama lawan aku, basusun mayat manjadi kajajakan urang mancapai dadampar kancana. ”

       Mandangar samunyaan pamandiran, kaya ditumbuk hati Pulasara. Ditimbang dipikir-pikir rasa bujur nang dipandirakan burung tu. Balalu inya bangun pada tapa. Bagamat mambuangi bilaran nang malilit awak, bagamat manurunakan anak burung pada kapala. Mambarabas bukah kaluar guha, mancari buah sagan makanan anak burung. Wayah anak burung makan, bacabur Pulasara ka talaga, mandi mambarasihi awak. Tuntung mandi duduk inya di higa sarang burung, makan buah babagi lawan anak burung.

        “ Kamana indung ikam maninggalakan? ” Pulasara manakuni.

        “ Jauh, ka atas rapun kariwaya di subarang Sungai Simpai Bagalung. ”

        “ Ayu, kuatar ka indung ikam. ”

        “ Banyak-banyak tarima kasih lamun hakun maatar. ”

        Lalu Pulasara mambawa anak burung, bajalan maninggalakan Wukir Ratawu, kaluar pada kawasan Sapta Arga. Susup alas mancing alas, susup kampung batamu kampung, kaluar-masuk hutan, subarang-manyubarang padang, malampai manuju Sungai Simpai Bagalung.



        Rahatan mambarimakani anak burung kadangaran siwara suling sapanggiring angin. Didangarakan ulih Pulasara ilun suling itu maingui nangkaya tangis. Ujar Pulasara, hidup wan pangrasa urang kawa dihinamakan ka dalam kata, kawa diturihakan ka dalam gambar, kawa jua disiwaraakan ka dalam bunyi; jadi lamun ilun suling tu maingui nang kaya tangis maka urang nang maniupnya musti lagi sadih, paling kada musti ada sual yang manimbarati pikiran. Bakiwit talinga Pulasara karana sasain lawas ilun suling sasain maingui, maminta kamaras urang nang mandangar. Anak burung lakas ampih makan. Kapalanya malangak satumat lalu tatunduk sabagaimana kambang layu. Imbah itu anak burung bakusur di sarang sambil manangis. Bakarucut dahi Pulasara malihat. Lima anam hari dibawa bajalan kada biasa anak burung tu bakusur sambil manangis, jadi mun sakali ni kaya itu musti ada kaitannya lawan ingui suling.

       “ Siwara suling tu-ah nang maulah ikam manangis? ”Pulasara manakuni.

        “ Iyaai. ” sahut anak burung. “ Mambari maras banar inya….”

        Siapa garang nang maniup suling tu? Nangapa garang maka bunyinya kaya itu? Rasa handak tahu Pulasara balajur kada kawa ditahani lagi. Badadas inya bajalan, kaya tarabang manambus hutan, maampah sumbar siwara suling, mamipit pinggiran Sungai Simpai Bagalung. Di atas batu, di pinggiran sungai, diliat Pulasara ada urang batanggui, duduk mancungkung hadap ka hilir. Supaya kada maaaur urang nang maniup suling tu Pulasara bagamat mamaraki. Ih, sakalinya bibinian, ujar Pulasara. Diitihi ulih Pulasara bibinian tu, muha saling bungasan tapi mata bangkur; kunung-kunungan banyu mata sangkut di bulu mata, di pipi babakas lilihannya. Babunyi anak burung, takipik Durgandini. Sunyi ingui suling, tacaragal Durgandini malihat ada lalakian bagus rupa badiri kada jauh lawan diinya. Handak manukup muha lawan sulindang hudah kada sawat lagi, nang kawa hingganya mambuang pandang ampah ka subarang.

        “ Yayi, bagus banar tiupan suling ikam….” ujar Pulasara.

        “ Sampian jangan mamuji….” sahut Durgandini.

        “ Mamuji nang bujur-bujur patut dipuji kadada salahnya, Yayi. ”

        “ Inggih, tarima kasih. Sampian ni siapa? Rasa hanyar ulun malihat sapanggiring Sungai Simpai Bagalung. ”

        “ Aku Pulasara, urang Paratapan Wukir Ratawu. Ikam pang siapa? ”

        “ Ulun Durgandini, tukang kayuh jukung di sini. ”

        Kalalangkaran tukang kayuh jukung, pinda manyaurangan ha pulang, kada takutanah inya? Pulasara bapandir di dalam hati.

        “ Lamun sampian handak manyubarang, ayu ulun atarakan. “

        “ Mimang aku handak manyubarang tapi kaina. Aku handak malalamarakan awak dahulu, maklum jauh aku jalanan. ”

        Pulasara handak duduk ka batu di higa Durgandini. Durgandini lakas baluncat manjauhi.

        “ Yayi, aku kada cagar babuat nang kada baik, jangan takutan, Yayi…”

        “ Inggih, ulun kada takutan lawan sampian. ”

        “ Kanapa baluncat bajauh lawan badanku? ”

        “ Ulun bajauh supaya sampian jangan siup. ”

        “ Siup? Kanapa maka kadada hujan kadada angin aku siup? ”

        “ Karana ulun bapanyakitan, awak ulun babau haruk. ”

        Taangkat kaning Pulasara mandangar. Diitihinya bahimat Durgandini. Nang ngaran inya hawas paningal kaliatan di balik baju kuring-manguring nang mahibak di awak Durgandini.

       “ Jadi itu nang maulah siwara suling ikam maingui kaya tangis? ”

        “ Inggih, nangkaya itulah nasib diulun. ”

       “ Ayu tulungi inya, ubati hampai waras. ” Pulasara mandangar anak burung baucap. “ Kadada paidahnya baiisian banyak ilmu lamun kada digunaakan manulungi diurang.”

        Bakintip satumat Pulasara, mamuja Sangiyang Sukma Suwara maminta pitua.

        “ Yayi, Durgandini, aku ada baisi paninggalan datu-nini. Jadi lamun ikam hakun bacucubaan aku maubati…”

        “ Hakun banar ulun. Itu juaam nang ulun harap-harap siang ka lawan malam. ”

        “ Lamun damintu ayu atar dahulu aku ka subarang. Aku handak maatar anak burung ni ka alah indungnya. ”

        “ Maatar anak burung pun? ”

        “ Iya, Yayi. Anak burung ni ditingggalakan ulih indungnya. Karana inya balum bisa tarabang maka minta atarakan ka atas kayu basar nang pucuknya kalihatan di subarang sungai tu. ”

Manga sawat Durgandini mandangar. Ujar Durgandini, agin labih sahapat urang ni, angkuh bisa bapandir lawan burung. Tapi nang ngaran kada bulih manampik lawan hudah taiihakan diubati maka dilapas tali jukung ulih Durgandini. Dibawaai Pulasara bakayuh manyubarang.

        “ Ikam hadangi di sini, Yayi. ” pinta Pulasara. “ Aku maatar anak burung ni satumat. ”

        “ Inggih pun, ulun hadangi sampian di sini. ”

        Bajalan Pulasara maampah ka kayu basar di tangah hutanan. Durgandini mangarut tali jukung lalu duduk banaung di bawah rapun kayu. Dibabayangakannya rupa Pulasara. Bungas mambari kapingin. Cuma, ujar Durgandini, mudahan kada labih sahapat. Mun labih sahapat makaam kucai tu pang. Lamun urang anum tuh labih sahapat bahanu mamangsa ka alah diurang, apalagi ka bibinian. Cakadanya tahu awak bakuringan babau haruk tatap digugutnya. Badimapa aku mun kaya itu? Lamun kutinggalakan ka subarang tasalah aku karana malanggar pitua Bagawan Iswara, manampik urang handak manyubarang nang minta hadangi. Bagana aku lalu kaina mambawa inya manyubarang, baduduaanam di punduk. Ngaran baduduaan bursiahalah inya bakalakuan nang manyalaya, dimapa aku? Biar kuciak papar siapang nang manunulungi. Rumah urang jauh di subalah padang halalang situ, di higanya hutanan danglu, di subalah sini sungai.

        Uyuh bapikir ngangal bapandir dalam hati lalu Durgandini barabah, babantal akar kayu. Angin manampur mahidupakan kantuk. Taguring Durgandini. Lawas taguring. Baya mailan talinganya mandangar bunyi kacapi. Lakas inya bapuat. Diliatnya Pulasara mancungkung di atas batu, lagi mambunyiakan kacapi. Naaahh, ujar Durgandini, di mana sidin baulih kacapi tu? Kada mandai mun taulih di tangah hutanan. Malihat Durgandini bangun ampih Pulasara mamainakan kacapi.

        “ Yayi, maap lamun bunyi kacapiku mambangunakan ikam. ” ujar Pulasara.

        “ Inggih, ulun nang harusnya minta maap karana taguring hingga maulah pian mahadang. ” manyahut Durgandini. “ Kanapa tadi kada pian garak ulun? ”

        “ Aku kadada nang dituju kadada jua nang disasah, Yayi. Jadi buat apa aku manggarak urang nang lagi guring janak. Lagi jua ikam tantu ngangal bakayuh subarang manyubarangakan urang. ”

        Mun didangar pandir ni kaya urang biasa haja, ujar Durgandini dalam hati. Basambung haja tuh pamandiran. Mun urang labih sahapat atanapi pagat lambaran cacaracau kada karuan, andih saurang haja nang dikajalnya.

        “ Ayu kita manyubarang, Yayi. Banyak nang kugawi sagan maubati ikam. ”

        “ Inggih, diaturi ka jukung, Kakang…”

        Babuat ka jukung bakayuh pulang ka subarang di bawah panas manggintang. Pulasara duduk di haluan, mambunyiakan kacapi sambil banyanyi lagu rantauan. (Supaya nyaman iindaannya, lagu rantauan Pulasara tu lagu nang kaya dinyanyiakan Ka Anang: barambai taluk barambai, barait lawan rantau badauh, tulak baimbai bulik baimbai, duduk di jukung jangan bajauh. Adapun sasahutan Durgandini: jurang mana jurang papari, jurang barakit kadangan mayang, urang mana datang kamari, hatiku sakit tabalik sanang.)


        Pas wayah matahari mancurung di tangah langit, di pinggir sungai Pulasara baulah balai pamandian. Ditajaknya turus paring kuning di ampat buncu, dibari balalangit kain hirang, dihias mayang pinang habang. Di bawah lalangit disusun talu tatak gadang pisang minurun, di higanya diandaki gumbang bakatinggiran kayu rawali, disadiakan gagayung barupa garabuk nyiur buta batangkai ilatung. Di atas gumbang bagantung ancak bakarawang jurai kaamasan, baisi ampat puluh satu macam kambang.

        Cundung matahari, Pulasara badiri babatis tunggal di bawah lalangit hirang, mahadap ampah ka hutanan. Rimang-rimut muntungnya, napakah nang dibaca. Kada sawat lawas bunyi tumbur di hutanan, dahan kakayuan baguyangan nangkaya ditampur angin ribut batubal. Babaya diitihi ulih Durgandini sakalinya baratus warik karibaian, kaluncatan ka tanah lalu manyasah ka alah inya. Napangada katakutanan Durgandini. Kada ingat di bau awak lagi bukahai inya, basalindung ka balakang Pulasara, papiruhutan di pinggang anak Bagawan Sakri.

        “ Baratus warik manyasahan, Kakang…” ujar Durgandini.

        “ Jangan takutan, Yayi. ” Pulasara manyahut. “ Warik tu datang karana kukiau. ”

        Bakiau warik? Gasan nangapa? Limbah tahu bubuhan warik tu kada cagar mamangsa hanyar sadar Durgandini kalu inya bapiruhutan di pinggang Pulasara. Kawawarihan han Durgandini, napang salawas bujang ni hanyar sakali tu ti baragap ka lalakian. Sawat mandagup dada, baguyangan daun waru di dalamnya. Dua talu kali bahinak basar hanyar inya bagagamatan malapas tangan pada pinggang Pulasara, balangkah bajauh sambil bapiragah mambaiki karutan mayang di paring kuning. Pulasara manyirit, kabalujuran Durgandini kalinya manyirit jua. Sirit batamu sirit babuah lihum. Akaidan!

        Bubuhan warik rupanya manahu, luncat-luncat barataan sambil baampik. Ada nang kukuciak sambil basumbalit, ada nang manari-nari sambil mangguyang buntut, ada jua nang maiji-iji sambil bagaru burit. Cah warikkah, macam-macamai mambawa laku. Tuntung maulu-ulu hanyar bubuhan warik tu babaris di hadapan Pulasara, kaya bubuhan punggawa baris di hadapan kumandan. (Baris warik tu sakalinya babanaran baatur, istilah wayahini tu basap talu-talu. Nang tatinggi di kanan nang randah di kiwa. Jadi mulai buhan bakantan, lalu uwa-uwa, bangkui, hanyar warik. Lamun kada parcaya, ada pidiunya lawan Maman, lihati ha.)

        “ Cariakan aku talung ratus buah nyiur gading….” ujar Pulasara mamarintah.

        Kada balanggar waktu lagi bubar barisan warik, kalimpancaian mancari rapun nyiur gading. Nang kada tadapat lakas mangiau tupai, batakun di mana ada nyiur gading. Limbah dipadahakan tupai andaknya balajur barabasanai bukahan, kada sawat batatarima kasih lawan tupai. Manda’i lamun warik, ujar tupai gagarunum sambil baluncat ka rapun sawu.

        Parak sanja, batuyukan buah nyiur gading di higa balai pamandian. Dibalah tunggal bigian ulih Pulasara, banyunya dibuat ka dalam gumbang, dikambuh lawan ampat puluh satu macam kambang. Di dalam punduk, Durgandini manjarang banyu batanggar kincing. Mahadang-hadang banyu manggurak, mahadang-hadang nasi masak, ditiupnya suling. Siwaranya mailun pang tapi ilunnya lain pada nang masi. Lamun nang masi mailun kaya tangis, nang sakali ni mailun kaya kambang rakah mahadang kupu-kupu, kaya ilun anak kucing mahadang kawan basimban. (Nang kaya apa yu tu ti? Iindaakan ha saurang. Lamun kada kawa jua maiindaakan takuni ha Pakacil Thabry. Urang Asam Cangkuk nang saikung tu harat maiindaakan. Napang sidin bahari rajin bahaliwawat di bawah rapun kapuk jangkang wan rapun binuang sambil maiindaakan jadi anak muda pamandaan.)

        Ai, nangapa nih wahana maka pangrasa surung sintakan, ujar Durgandini dalam hati. Hanyar kamai pangrasa nang kaya ini ni. Kamarian samalam baluman ada lagi. Baiisukan hintadi baluman ada jua. Jadi pabila mulainya? Matan mana datangnya? Agin wayah aku bapiruhut di pinggang Pulasara hintadi? Ai, iya jua ai sakalinya, matan situ jua ai mulainya. Sidin…sidin…nangapa yu maka kaya itu? Wah…Diwa…Diwa, jangan digugut batang bidara, rasanya pahit marintak-rintak, tumatan bapiruhut di pinggang Pulasara, pikirku sakit basurung-sintak. Wah…landian amas landian intan, hatiku lamas bapapandangan.

        Mandarudut bunyi suling, napang pikiran malayang-layang hingga maniup luput pada luang. Baik jua kabalujuran banyu manggurak nasi padar hingga kada tapi kantara napa marganya tiupan suling darudutan lalu ampih manggasut. Durgandini maampar tikar, manyadiakan makanan lalu mangiau Pulasara.

        “ Kakang Pulasara…”

        “ Apa, Yayi? ”

        “ Bacandak dahulu bagawian. Ayu, diaturi dahar…”

        “ Iya, Yayi. ”

        Pulasara mamabasuh tangan, masuk ka dalam punduk.

        “ Saadanya, Kakang. ” ujar Durgandini. “ Cuma ada iwak karing wan taruk gumbili. Maklum urang kampung jauh pada pasar. ”

        “ Aku ini urang paratapan, urang manggunungan, jadi sahari-hari nang kaya ini jua, malah lamun lagi batapa kada ingat dimakan, Yayi…” Pulasara manyahuti sambil duduk basila. “ Ayu, kita makan baimbai. ”

        “ Jangan, Kakang… ” Durgandini manampik. “ Kaadaan ulun balum lagi maijinakan makan baimbai. Mudahan kaina ulun waras hingga kawa makan baimbai lawan sampian. ”

        Durgandini bajauh ka balai pamandian, duduk di balahan nyiur gading lalu maniup ka suling. Sambil makan Pulasara maningau ka alah Durgandini. Bagagamatan bunyi suling baubah jadi jarum, manyulam banang jadi gambar kambang malarak di dalam hati. Ujar Pulasara, pitu bidadari kayangan datanmg mangguda kada kaya ini aku pangrasa. Wah… hanyar haja kambang malarak, pampat bagamat di higa paring, hanyar haja hatiku rusak, matan talihat lihum si ading.

        Tangah malam. Bulan ampat walas, bulat bulaling mancarunung di langit; bintang bahambur sumarak bakilip; awan putih nipis baarak sapanggiring angin; dadaunan mandasau, bunyi banyu Sungai Simpai Bagalung ricik-ricik, bilalang bakitik jangkring bakirik; kukus matan parapin balinggang-lingguk, manari mahambur harum manyan putih. Durgandini batilanjang bajajak di gadang. Batunduk manyimbat hakikat umbayang intan, batingadah manyimbat hakikat bintang-bulan. Pahinakan ditahan, banyu nyiur gading bakambuh ampat puluh satu macam kambang dicibuk, dibaca isim-isim lajaran Bangbang Pulasara.

        bayu amas bayu dandaku
        kambang amas kambang liwarna
        bakubui bakujamas raga badanku
        barakat pikaras pacul panyakitku

        nang datang matan angin bulik ka angin
        nang datang matan tanah bulik ka tanah
        nang datang matan banyu bulik ka banyu
        nang datang matan sagala sasuatu bulik ka sagala sasuatu
        manikam kuning manikam putih
        bajauh ikam jangan bapalih. ”

        Tuntung mambaca isim-isim ditiupakan talu kali ka dalam garabuk lalu dikubuiakan, lancur matan hujung kapala hampai ka hujung batis. Dicibuk pulang banyu nyiur gading, ditating ka langit. Mata dikintapakan, hati pikiran diranaiakan, lalu dibabayangakan bidadari kayangan basuka barami mandian di Talaga Tali Gading Umbak Ambun Siringan Naga di dalam Karang Bidadari. Isim-isim dibaca.

        “ parupuk turusku mandi
        dihamputakan duri talaga
        kaya humbut awakku mandi
        marabut cahaya kumala naga.

     Ditiupakan talu kali dikubuiakan pulang ka awak. Tarus bakubui hampai habis banyu nyiur gading di gumbang. Lalu Durgandini batalimpuh di atas gadang, baukup di kukus manyan putih, sambil maiindaakan diri baayun di Balai Gantung Angin di atas kawah Chandradimuka saking Kuta Miring Kayangan.

        “ sintak kukus manggawang langit
        kuampak kukus manjarang kulit
        kambang jarum manakal langit
        hakikat harum kakal barikit. “

        Jadi kada kaya paribasa, Sangiyang Wanang punya mau, Diwa marastuakan, pacah kuriping kuring, mancurat nanah kaya pancuran, bagumpal kaluar hulat-mahulat, larut sapanggiring Sungai Simpai Bagalung. Bulan bintang lakas bacaram. Kadap antiru. Nang tatinggal bacahaya nang tatinggal mancarunung nang tatinggal bakilalap cuma awak Durgandini. Parcis humbut diandak di kain hirang! (Wayah maunjun pair di Bangkau, Abdal biasa batamuan nang mampilak kaya humbut tu ti. Napangada inya mamparapas bukah, kacabauan di banyu, habis jutut timbaku. Cuma kada takisah pang lawan aku inya tu bukah bajauhkah bukah manyasahkah, ha...ha..haa.)

        bangayu manis raga mambi
        bulik wayahnya mangarindangi
        hiyaaaiii…….


        Subuh bamula baumbayang. Hayam kungkuakan, burung-burung babunyian, daun mahilung ambun. Pulasara badiri di atas batu mahadap matahari hidup, batingadah marajah rakun, basisiut talu kali, babatis tunggal basidakap bapayung sisa sumarak bintang; maminta lawan Sangiyang Sukma Suwara supaya diadakan kadatun di pinggir Sungai Simpai Bagalung.

        Rupanya napa nang diminta Pulasara saraju lawan kahandak Sangiyang Sukma Suwara. Balum pacah riak di muntung, balum hilang lumbang di dada, balalu ada kadatun di pinggir Sungai Simpai Bagalung. Di halaman kadatun, padang halalang baubah jadi tanah lapang barumput hijau, tumbuh waringin kurung kambar dua bacabang talu.

    Tanganga Durgandini malihat kadatun. Rasa kada parcaya dipusut-pusutnya mata, tatap mancungkung kadatun. Dikijip-kijipakannya mata babarapa kali, limbah dilihati pulang dasar mimang kadatun juaai.

        “ Yayi, Durgandini….”

        “ Inggih, ulun pun….”

        “ Ayu, ikam bari ngaran ini kadatun. ”

        “ Sampian haja, Kangmasai, nang mangarani karana sampian pang nang maadaakan. ”

        “ Jangan, Yayi, ikam maka nang mangarani.”

        Takarucut dahi Durgandini, bapikir mancari ngaran nang baik. “ Kakang Pulasara, kaya apa lamun ini kadatun kita bari ngaran Gajah Huya? ”

        “ Gajah Huya? ”

        “ Iyaai, Gajah Huya. ”

        “ Artinya, Yayi? ”

     “ Ngaran itu supaya maingatakan wayah kita maikat rasa mambuhul janji di atas jukung sapanggiring Sungai Simpai Bagalung. Gajah itu ngaran batu ganal nang kita tumbuk lawan jukung. Huya artinya banyu baah. Jadi Gajah Huya pas lawan kajadian banyu baah, jukung hancur manumbuk batu gajah. ” Durgandini manarangakan arti ngaran nang diulahnya.

        “ Bagus, Yayi. Tinggal lagi maadaakan bubuhan punggawa wan hamba rakyat Nagara Gajah Huya.”

        “ Hamba rakyat tu datang saurangnya kaina, Kangmasai. Lamun Gajah Huya aman, makmur, nyaman pancarian, barundut haja kaina urang datangan. ”

        “ Iya, Yayi, tapi parlu jua diunjuni dahulu supaya lakas datangnya. ”

        “ Ai, badimapa maadaakan punggawa wan hamba rakyat? ”

        “ Ayu ikam naik ka atas batu sini supaya jangan takajut. ”

        “ Ai, nangapa nang handak sampian gawi? ”

        Pulasara kada banyahut. Inya bakuciak talu kali. Kada sawat lawas tumbur hutan lawan sungai. Saparu binatang nang badiam di hutan wan sungai datangan babaris ka hadapan Pulasara. Bakirik Durgandini, bagamat basasar ka balakang Pulasara.

        “ Aku mamarluakan punggawa wan dayang sagan kadatun Gajah Huya. Ikam barataan kupuja kujampi-jampi supaya manjadi manusia….”

        Basidakap Pulasara mambaca isim-isim. Tuntung mambaca isim-isim ditiupakan talu kali ka tangan kanan, ditating ampah ka bubuhan binatang. Talu kijipan mata talu hiutan hinak ubah barataan manjadi manusia. Binatang laki manjadi lalakian, binatang bini manjadi bibinian. Manusia nang baasal matan iwak kumandannya dibari ngaran Minakarida. Manusia nang baasal matan kutang kumandannya dingarani Sunaka. Manusia jajadian buhaya kumandannya bangaran Singaranu. Manusia jajadian macan kumandannya dingarani Singaludra. Manusia jajadian sapi kumandannya dibari ngaran Andakawana.

        Balalu batata urang di Gajah Huya. Bandira digantung di hujung tihang. Dadampar kancana diandak di balai panghadapan, di balakangnya diandaki payung Mahdaruna payung pusaka Bagawan Sakutram nang diwarisakan ka alah Pulasara. Di tawing baandak air guci jurai kaamasan hasil lampahan ampat puluh bibinian: di patangahan ada gambar padang kasalukutan, manandaakan sumangat nang mancararau kaya api mambanam padang; di pambapang bawah basusun gambar pucuk rabung, manandaakan sikap waspada, panjang pikir luas pandangan; di punca ada gambar paksi malayang, manandaakan kagagahan wan kawanian nangkaya burung manyimbat mangsa; pambapang atas bagambar halilipan, manandaakan kada takabur, suka marandahakan diri tapi kada baundur lamun diaaur.

        Kaasikan manata Gajah Huya, Durgandini kada tabulik ka Wirata, kalumpanan bahabar lawan kulawarga dimana inya bagana. Pulasara damintu jua, kada kaiingatan manyuruh Durgandini bahabar atanapi bakirim pasan.



        Pitung ikung manusia di atas kuda kulilik-kulilik di saputar punduk Durgandini. Di atas kuda putih Durgandana basisilau, maningau ka kiwa ka kanan mancarii kaka. Jangan urangnya, umbayangnya haja kada talihat. Jukung hilang, nang ada cuma turus pangarut tali jukung. Ujar Durgandana, kamana kakaku nia. Bulan dahulu kudatangi ada haja, malah batambah wagas karana rancak basanam mangayuh jukung.

        Minggu tadi kutakunakan lawan bubuhan padagang di pasar nang bakas manyubarang sungai bapadah umpat di jukung nang tukang kayuhnya lunglup batanggui batukup muka; artinya inya umpat di jukung kaka. Lalu kamana kaka?

        “ Dinayu Durgandini kada talihat. ” saikung punggawa balapur. “ Cuma ujar urang di hulu tadi, lima hari nang lalu sungai baah manggasut…”

        “ Baah manggasut? ” Durgandana mamagat pandir, hatinya bagaritik.

        “ Inggih, baah manggasut. Lamat-lamatan ujar urang tu ada tadangar siwara nangkaya kuciak bibinian. ”

        Garitik hati Durgandana baubah jadi galumbang. Bursiahalah jukung kaka ditumbuk baah. Maka nang ngaran ditumbuk baah musti napa nang larut kaya dihimpatakan. Jukung nang kaya dihimpatakan musti kada kawa dikamudiakan. Mun sudah kada kawa dikamudiakan bisa manumbuk batu atanapi langlam di ulak. Galumbang di dada Durgandana makin baganal. Ditikinnya parut kuda lawan tumit, kuda bukah manyisir hilir Sungai Simpai Bagalung. Bubuhan punggawa lakas jua manikin parut kuda, manggiring laju kuda Bangbang Durgandana, manyusup ka dalam hutan.

        Sakaluar pada hutan mawah Durgandana malihat ada kadatun. Kadatun apa ini? Siapa nang wani-wani manajak kadatun di tanah Wirata? Ujar Durgandana, manajak kadatun di tanah urang kada sing padahan sama lawan mambawai kalahi. Tadundum ikam ari ini. Lamun kada hakun mancabut ini kadatun, urangnya kutangkapi, kadatunnya kuhancur! Balalu masuk Durgandana ka lawang sakiping Gajah Huya. Pitung langkah pada lawang disambang ulih Andakawana.

        “ Satria, ini kadatun apa? ” Durgandana manakuni.

        “ Ini Kadatun Gajah Huya. ” sahut Andakawana.

        “ Gajah Huya? Siapa nang mandiriakan? ”

        “ Pagustianku. Jang Sinuhun Bangbang Pulasara. ”

        “ Urang mana? ”

        “ Urang paratapan Wukir Ratawu. ”

        “ Ayuu, kiau Bangbang Pulasara mahadap diaku. ”

        “ Sagan nangapa pagustianku mahadap diikam? ”

        “ Ini kadatun batajak di tanah Karajaan Wirata.”

      “ Sapangatahuanku kadada bapadah lawan Kanjang Rama Parabu Basukati. Jadi Bangbang Pulasara harus batanggung jawab. Lamun kada kakaruan inya bakal kubair sapanjang jalan ka kadatun Wirata! ”

       Nang ngaran Andakawana ni manusia jajadian sapi liar, tamasuk nang talinga rinjingan lakas langatnya. Mandangar pagustian handak dibair, manciling Andakawana.

        “ Jadi ikam handak mambair pagustianku? ”


        “ Mimang macam itu. Urangnya kubair, kadatunnya kurataakan lawan tanah! ”

        “ Gampang urusannya! ” ujar Andakawana sambil manyingsing tangan baju.

        “ Gampang kaya apa? ”

        “ Gampang banar! Asal ikam ada baisi kawanian, kawa malalui panjagaan Andakawana! ”

        “ Kulabar jamu! Wayah dipawayah, tata dipatata! Jadi ikam handak bajual kawanian lawan diaku? ”

        “ Bajual hakun batukar hakun! ” sahut Andakawana. “ Sabarapa haraga kada batampik. Maminta duit ganal kujulung duit ganal, maminta duit halus kutuyuk duit halus! ”

        Turun pada kuda Bangbang Durgandana. Kaduanya bahadapan, sama mamasang kuda-kuda. Andakawana manarajang, manampuh nang kaya sapi. Durgandana bakitar dua langkah ka kanan, baputar sambil manyipak. Andakawana marandahakan awak, tangan kanan manyuntul ka muha. Durgandana balas manyuntul. Blam! Suntul batamu suntul. Kaduanya sama taundur dua langkah. Tangan sama asa kipa, tanda tanaga baimbang. Andakawana manarajang pulang. Durgandana malayani. Suntul babalas suntul. Tampar batamu tampar. Sipak basampuk sipak. Patamuan angin pukulan manimbulakan bunyi kaya guntur mandaram. Bubuhan punggawa sama pada basurak, manyumangati nang bakalahi.

      Mandangar bunyi garabauan, mandangar urang bahiap, matan kadatun Gajah Huya cungul Pulasara wan Durgandini. Takajut Durgandini malihat ading bakalahi lawan Andakawana.

        “ Adimas Durgandana, tahan pukulan! ” Durgandini lakas manmguciaki.

        Durgandana manyampuk tamparan lalu basumbalit ka balakang. Andakawana damintu jua, bajajak ka tanah sambil tatap mamandang Durgandana. Takarucut dahi Durgandana malihat kaka ada di situ. Makin takarucut dahinya karana maliat kadada lagi kurung-manguring di awak Durgandini.

        “ Nah, di sini sakalinya sampian adanya. ” ujar Durgandana. “ Pabila warasnya panyakit sampian? Napa maka kada bulik ka Wirata? ”

      “ Panjang kisahnya, Adimas. Bakatahuan hulu kita. Ini Kakang Pulasara, urang nang maubati panyakitku. ” sahut Durgandini manunjuk ka alah Pulasara. “ Kakang Pulasara, ini ading ulun, Bangbang Durgandana. ”

        “ Ayu, Adimas Durgandana, kita bapandir di dalam kadatun. ” Pulasara mambawai.

        “ Inggih, diaturi. Ulun handak basalaman dahulu lawan ini satria. ” ujar Durgandana sambil mamaraki Andakawana.

          Basalaman kaduanya. Sama mangguncang tangan, sama manapuk bahu, sama mamuji kahibatan satu sama lain.

        “ Papadaan sakalinya kita….” ujar Andakawana sambil mangibah dabu di baju.

        “ Iyaam. Cuma bakatahuan papadaan di padang kalahi itu adat laki-laki. ” sahut Durgandana.

        “ Ayu, diaturi malabat saking kadatun. Punggawa ikam urusanku malayani. ”

        Bajalan Durgandana masuk ka kadatun Gajah Huya. Baduduk di hadapan Pulasara wan Durgandini. Mandangarakan kisah mulai pamulaan hampai pahabisan.

        “ Aku nang salah. ” ujar Durgandini. “ Kada kaingatan bahabar lawan Kanjang Rama….”

    “ Iyaam. ” ujar Durgandana. “ Mauk ulun mancarii saputar punduk. Sakalinya, nyaman-nyamannya mamakan karak, mamakan karak di pipiringan, nyaman-nyamannya sapangan parak, kada kaingatan lawan kawitan. ”

        Satangah bulan imbah itu batajak balai panataian di Wirata. Di atas kurita kancana nang dijuhut anam ikung kuda putih, duduk Pulasara bapayung Mahdaruna, diarak mulai Gajah Huya ka Wirata. Sapanjang jalan gamalan babunyi kada baranti. Urang basurak sambil manari-nari. Ala surak ala tampikana, ala surak pangantin datang. Durgandini hudah mahadang. Lalu kaduanya ditataiakan di balai panataian. Pitung hari pitung malam urang basuka-barami. Ampih muru kadatun Wirata




DUA AYUNAN SAPANYUSUAN

        Bunyi hantakan batis kuda mangguntur, manggantar kawasan babukit bagunung-gunung. Binatang-binatang hutan tumbur, dadaunan baguyangan, saluruh burung tarabangan. Kada sawat lawas matan hutan cangul ribuan panunggang kuda, malintas amparan tanah karing babaju rajang, lancing kaya anak panah dilapas. Dabu bagumpal, balalar kasitu-kamari dihambur angin. Pasukan bakuda tu bapakaian saraba hirang, bajubah hirang balaung hirang. Panji wan umbul-umbulnya nang kibar-kibaran babalang hirang jua, bagambar tangkurak putih wan dua tulang basilang.

      Matan atas bukit Santanu basisilau, mamandang Pasukan Hirang nang malaju kada tulih kiwa kanan. Ujar Santanu, ini pasukan mana, handak ka mana? Rasa kada biasa aku mandangar ada karajaan babandira hirang bagambar tangkurak putih wan dua tulang basilang. Pasukan karajaan mana ini? Mun dilihat parigal, dilihat paralatan nang dibawa, ini pasukan urang tulak kalahi atanapi pasukan nang tulak manyarang banua urang. Manyarang siapa inya?

        Pikiran Santanu pagat ulih tangis Diwabarata. Kakanak habang tu kapanasan bajamur di atas bukit, lagian jua ngalih inya bahinak karana angin bakambuh dabu. Lakas Santanu manikin parut kuda, bajalan manuruni bukit. Pasukan karajaan mana, handak manyarang siapa, kada lagi dipirakannya. Nang ada di pikirannya, dalam timpu lima hari harus tadapat bini-bini nang rasuk banyu susunya lawan Diwabarata, karana hampai ari itu nujuman Bagawan Kasapa mimang tatinggal lima hari lagi. Artinya lamun lima hari ni kada tadapat banyu susu bakal runtuh Astinapura!

      Kaluar pada hutan, Santanu malihat karusakan nang ditimbulakan Pasukan Hirang. Kampung nang ditamuinya habis hancuran. Rumah-rumah habis gusangan. Mayat basusun di tangah lapang. Di bawah kakayuan humbalingan urang nang luka.Takumpulan bibinian wan kakanakan. Tangis garung-garungan.

     Katipak kuda Santanu maulah urang kampung manulih. Malihat nang datang tu lalakian babaju runcang-rancing bagindungan anak batambah katakutanan urang. Ujar urang, agin ini urang gila nang dihabarakan amuk tu. Amun bujur ini urangnya maka iyaam, kada cagaran manyamani sahama-hama; lapas pada muntung buhaya masuk ka muntung macan. Lalu, dimapa akalnya supaya urang gila ni lakas bajauh? Saikung urang tuha bagamat mamaraki Santanu, bajalan pincang karana di batang paha paguni mumui darah.

        “ Maap, lamun kadada kaparluan muhun kami ditinggalakan. Kami lagi kana musibah. Liat, kampung kami hancur, mayat balum takuburakan, nang luka balum sawat taubati….”

        “ Aku mangarti, tapi nang ngaran aku ada maksud kada kawa lakas bajauh. ” ujar Santanu. “ Kaya ini ha, Pakacilai, kaya apa lamun kita saling bantu, saling batutulungan satu sama lain…”

        “ Maksud ikam kaya apa? ”

       “ Aku ada baisian minyak luka. Lamun minyakku dikambuh lawan minyak lalaan nyiur gading lalu disapuakan ka mata luka, kada sawat lawas bakantup mata luka. Jadi aku mambarii minyak luka, bibinian ikam suruh manyusui anakku…”

        Dari pada balukaan bamatian pulang baik dituruti kahandaknya, ujar si urang tuha dalam hati. Sual mancubai manyusui tu nyaman haja, bibinian takumpulan haja. Lagian, untung untungan, lamun minyak lukanya babanaran harat bakal taubati bubuhan kampung nang luka.

        “ Kuakuri. ” sahut si urang tuha. “ Tapi karana kami kada baisian minyak lalaan nyiur gading maka kita malala dahulu…”

      “ Aku lagi disasah ari, kada kawa mahadang lalaan nyiur gading. Jadi susuiakan anakku, cari butul puang kaina kupalih minyak lukaku. “

       Pahadangan bibinian kampung mancubai manyusui Diwabarata, Santanu mambuktiakan kaampuhan minyak lukanya. Disapuakannya minyak luka ka batang paha si urang tuha, kada sawat lawas mimang darah ampih kaluaran lalu bakantup mata luka. Talu ikung nang rabit parut wawah balukuk damintu jua. Parcayaai urang kampung. Lakas babarapa ikung mancari nyiur gading. Si urang tuha babacarian butul, baik jua tadapat butul bakas kasumba. Tuntung mamalih minyak luka, Santanu duduk basandar di rapun kayu.

        “ Tahulah pian Pakacil matan mana Pasukan Hirang tu tadi? ” Santanu manakuni si urang tuha nang duduk di higanya.

        “ Ujar kumandannya tadi, datang matan Nagara Tawing Sagara, jauh di subarang laut. ”

        Amun andaknya di subarang laut, mandai haja aku kada biasa mandangar, ujar Santanu dalam hati.

        “ Handak kamana buhannya tu? ”

        “ Mancari karajaan nang bangaran Astinapura! ”

        Malabuk dada Santanu. “ Astinapura? Handak napa buhannya ka Astinapura? ”

        “ Kada tahu jua, inya kada mamadahakan jua. Tahu pang kami ada karajaan nang bangaran Astinapura, tapi karana kada tahu jalan ka situ maka Pasukan Hirang tu manyalukut kampung. Kami malawan, iya nang balukaan bamatian ni. ”

        Dalam hati Santanu, asa kadada hualnya lawan Nagara Tawing Sagara di subarang laut tu. Mandangar ngaran karajaannya haja hanyar sakali ni. Jadi nangapa maksud jauh-jauh datang mambawa pasukan maluruk ka Astinapura? Taungut Santanu. Rambang pikiran, antara babulik ka Astinapura lawan tarus balalah ampah ka matahari pajah.




        Agin ini ada kaitannya lawan nujuman Bagawan Kasapa? Agin Pasukan Hirang tu nang cagar maruntuh Astinapura? Lamun aku babulik baarti kada tadapat susu Diwabarata. Kada tadapat susu baarti runtuh Astinapura. Jadi biar aku babulik tatap runtuh Astinapura karana kada tadapat susu Diwabarata. Artinya, babulik aku sia-sia jua, kada mambari manapaat apa-apa lawan Astinapura. Apabila di kampung ni kadada banyu susu nang rasuk aku harus tatap bacacari, mudahan dalam lima ni batamuan. Sual Astinapura tasarah kabijaksanaan Adimas Aria Basuwanda. Lamun pada takdir Astinapura runtuh jua, ingatakan buku janjiku: asal pahinakan paguni ada bakal kubalik Nagara Tawing Sagara!

        “ Lamun kita balalah ampah matahari pajah, jalanan ni ka mana hampainya? ”

        “ Kada tahu ka mana hujungnya. ” sahut si urang tuha. “ Nang nyata dua hari jalanan bakal batamuan jalan basimpang tiga. Babiluk ka kiwa, bakal hampai ka pinggir laut. Mun kada salah dangar tadi, di situ labuhnya kapal bubuhan Pasukan Hirang. ”

        “ Lamun babiluk ka kanan pang? ”

        “ Babiluk ka kanan bakal hampai ka Nagara Wirata. Lamun jalan batarus, bakal hampai ka kadatun Gajah Huya. ”

        “ Lamun Wirata aku biasa mandangar, tapi lamun kadatun Gajah Huya rasanya hanyar sakali ni mandangar.”

        “ Gajah Huya tu kadatun hanyar. Hanyar bangsul tangah dua tahun ni haja. ”

        “ Siapa rajanya? ”

        “ Bangbang Pulasara, minantu Parabu Basukati, Raja Wirata. ”

        Santanu untuk-untuk. Saikung bibinian datang mambawa Diwabarata. Pas tangguhan Santanu, kadada juaai banyu susu nang rasuk. Jadi digindungnya Diwabarata, dibawa baluncat ka atas kuda. Karana aku maampah matahari pajah, ujar Santanu, baarti aku jalan batarus, maampah ka Gajah Huya.

        Karana basinggah-singgah di tiap kampung mancubai banyu susu, jalanan nang mustinya dua hari hampai lima hari hanyar tambus ka lawang sakiping Gajah Huya. Diliat ulih Santanu urang rata-rata bagawian, mahias saputar kadatun wan baulah balai padudusan. Limbah mangarut kuda, Santanu bajalan mamaraki. Hanyar lima lingkang, bakiau Andakawana.

        “ Satria, ikam pindanya urang hanyar di sini. Siapa ikam? ”

        “ Aku Santanu. ”

        “ Urang mana? ”

        “ Urang Nagara Astinapura. ”

        “ Uuu, urang jauh sakalinya. ” ujar Andakawana. Kaingatan inya di habar urang. Kira-kira, ujar Andakawana, iya ini urang gilanya.

        “ Maksud datang ka Gajah Huya? ”

        “ Aku handak batamuan raja ikam…”

        “ Uuu, kada kawa….”

        “ Napa maka kada kawa? ” Santanu lakas mamagat pandir Andakawana.

        “ Raja kami lagi mamuja samidi di sanggar pamucang, lagi mancari pitunjuk sagan mambati ngaran anak. ”

        “ Jadi parmaisuri Gajah Huya hanyar baranakan? ”

        “ Yah, mimang macam itu.”

        “ Lamun aku kada kawa manamui raja, batamu lawan parmaisuri barang. ”

        “ Tatap kada kawa. Kadada adatnya lalakian kada bakapatuhan manamui parmaisuri Gajah Huya. ”

        Bapikir Santanu. Ujarnya dalam hati, tahu haja pang aku ni di adat urang, tapi nang ngaran hudah singkip arinya kada kawa lagi aku batata nangkaya biasa. Satu-satunya jalan aku mancari hual supaya bakalahian. Mun mandangar tumbur bakalahian mau kada mau kaina musti kaluar raja atanapi parmaisurinya.

        “ Kalu kaya itu ikam baisian dua pilihan. ” ujar Santanu.

        “ Maksudnya? ”

        “ Garak raja ikam pada patapaan, padahakan Santanu handak batamuan. ”

        “ Hudah kupadahakan kada kawa! Mandangar kalu ikam hintadi? ”

        “ Pilihan nang sabutingnya, kugarak saurang raja ikam, atawa kutamui saurang parmaisurinya. ”

        Manda’i amun gila, ujar Andakawana, kada tahu di adat. Sudah dipadahakan kada kawa tatap haja mangaras.

        “ Kupilih nang kadua. ” sahut Andakawana. “ Tapi ada syaratnya. ”

        “ Napa syaratnya? ”

        “ Lalui hulu kami nang ada nih…”

        Andakawana mambari tanda lawan bubuhan punggawa supaya manangkap Santanu. Rugi, ujar Andakawana, lamun aku saurang nang manangkap urang gila ni, bahujung bapanyambatan banar ham kaina. Santanu kada banyak pandir lagi. Pau! Pau! Ditamparnya dua ikung punggawa nang mamaraki. Manyasah punggawa lain. Eeiitt…… Santanu mamasang kuda-kuda lalu amuk. Awaknya bagarak capat, nang kalihatan bilang umbayang haja lagi, basusup ka situ ka mari sambil manampar-manyuntul-manyipak. Salawi punggawa maluruk salawi humbalingan. Bapuluh datang bapuluh tarabang kalimpancaian. Sunaka datang, Sunaka tatilantang. Minakarida takusur di tanah. Singaludra tapulanting manumbuk tawing.

        Tapaksa Andakawana malabuni. Pukul-mamukul, suntul manyuntul, sipak manyipak. Di jurus ka talung puluh pukulan Santanu masuk ka dada, tajarunjung Andakawana, mangaruh nangkaya sapi disumbalih. Lakas inya bapuat, mambaca ajian manjajak tanah talu kali, manarajang sambil manampar. Santanu basingkir, batis diayun, sangkut ka parut Andakawana. Tajarunjung Andakawana, maubah kuda-kuda sambil manyapui darah nang lilih di buncu bibir. Santanu kada mambari timpu lagi, manarajang mambawa suntul ampah ka muha. Lalu, nangkaya kilat manyambar datang umbayang urang, talapak urang tu manyampuk suntulan Santanu.

        Blaaass! Santanu nangkaya manyuntul kapas, tanaganya tinggalam kada katahuan. Lakas inya manarik tangan. Rahatan manarik tangan tu datang talapak tangan urang ampah ka dada. Santanu mamutar pagalangan lalu manyampuk talapak tangan nang maampah dada. Blaarr! Dua kakuatan batamu, manimbulakan bunyi saling hangkuian. Santanu marasa awaknya kaya ditampuh banyu baah, taambung mamacah angin. Siapa urang ni, ujar Santanu, hibat kakuatannya, kawa maulah aku taambung. Lakas Santanu basumbalit, turun manjajak tanah.

        Pulasara mamuat Andakawana lalu babalik mahadapi Santanu. Kaduanya saling pandang, saling ukur kamampuan. Wayah Santanu maubah kuda-kuda manangis Diwabarata. Lakas Santanu manampuk burit anak lalu siwara paraunya badundang mambujuki anak.

        pauh juntaian, anakai, pauh pancukan
        jauh lampaian, anakai, jauh jalanan

        dahan jambu, bauntungai, turus papari
        balum batamu, bauntungai, susu dicari

        Mandangar tangis Diwabarata, kaingatan Pulasara lawan tangis anak burung bahari, tangis urang ditinggalakan kawitan. Luluh hati Pulasara. Kuda-kuda ditarik, tanaga disimpani. Badiri inya basidakap sambil malihatakan Santanu kipuh mambujuki Diwabarata.

        “ Ai, anak siapa manangis saling hangkuian….”

        Durgandini cangul matan kadatun sambil bagindungan anak.

        “ Anak urang gila nang dihabarakan urang dahulu tuh…” ujar Andakawana.

        “Aku kada gila. “ Santanu manyahut. “ Jalanan lima bulan nang maulah aku kaya ini. ”

        “ Lalu siapa Andika? ” Pulasara nang manyahut.

        “ Santanu, Raja Astinapura. ”

        “ Raja Astinapura? ”

        Santanu mamasukakan tangan ka kantung baju, maungkai panji Astinapura nang bilang kada batawas lagi.

        “ Jang Sinuhun, jangan parcaya pandiran urang gila….” ujar Andakawana.

     “ Ini pang sakalinya rajanya, ” ujar Santanu sambil manyimpani pulang panji ka dalam kantung. Tangannya manampuk Diwabarata tapi tangis Diwabarata kada mau ampih, likan bahangkui.

        “ Urang ti mun bajalan ka jauh anak ditinggal, kasian inya dibawa bahujan bapanas. ” ujar Dirgandini.

        “ Anakku niam nang maulah aku balalah maampah matahari pajah. ”

        “ Kasian banar inya yat, kahausan kalu inya. ”

        “ Kada cuma kahausan, tapi liwar kahausan, lima bulan kada tarasa susu kada talasuk satitik banyu. ”

        “ Kadadakah umanya? ” Pulasara batakun.

        “ Umanya diambili Batara Yamadipati saminggu limbah maranakakan. ”

        “ Kanapa maka kada dijurung ka kulawarga nang lain manyusuiakan? ” ujar Durgandini.

       “ Jaka ada banyu susu nang rasuk cakada hampai aku ka sini. Dalam lima bulan ni ratusan ribu bibinian sudah mancubai manyusui.”

        “ Jadi itu nang maulah ikam amuk minta susuiakan anak nang kaya dihabarakan urang tu? ”

     “ Tapaksa kaya itu karana manurut nujuman kalu dalam lima bulan kada taulih banyu susu nang rasuk bakal hancur Astinapura. Ari ini ari nang pahabisan. Jadi harapanku tinggal sabuting, taulih banyu susu nang rasuk di Gajah Huya.”

        “ Lamun kada taulih jua dimapa? ”

        “ Hancur Astinapura. Lima hari nang lalu sudah kulihat Pasukan Hirang urang Nagara Tawing Sagara baampah manyarang Astinapura. ”

        Bapaling Pulasara ka alah Durgandini. “ Adimas Durgandini, ayu ikam cubai manyusui anaknya. Lamun kada rasuk jua, kita kumpulakan bibinian di Gajah Huya lawan di Wirata. ”

        “ Inggih pun, napaapa ujar sampian, Kangmas….”

       Dijurung anak ulih Durgandini ka Pulasara. Diambilnya Diwabarata pada gindungan Santanu. Hanyar dijapai ulih Durgandini ampih tangis Diwabarata. Basalindung di balakang Pulasara, disusui ulih Durgandini anak Santanu. Nangkaya iwak batamu banyu, lahap Diwabarata manyusu.

        “ Ai, hakun inya Kangmasai manyusu. ” ujar Durgandini.

        “ Hakunah? ” Santanu mamustii.

        “ Iyaai, gancang banar inya manyusu. ”

        Mandangar sahutan Durgandini, Santanu lamah lintuhut. Banyu mata kunung-kunungan, titik ka tanah. Dipandangnya langit, palihatnya bajajak di awan aruah bininya lihum sambil mahambur kambang. Wah….Adimas Ganggawati…Adimas Ganggawati, barakat balangsar malima bulan paampihannya anak kita takinum jua banyu susu. Ikam kada sarana asa basangkalan lagi di hati, ayu ikam basuka barami manjalani hidup di alam subalah.

      Luhai hati Santanu, ringan pangrasa. Limbah luhai hati ringan pangrasa tu laluai karasaan awak saraba ringkutan saraba lunggaran, maklum makan-guring kada manantu, siang hari malam diambung kuda wan bakalahi sapanjang jalan. Mata jadi kunang-kunangan, kadap panjanak. Kada sawat lawas kada ingat napaapa lagi inya, raum di hadapan Bangbang Pulasara wan Durgandini.



        Limbah mandi wan baganti pakaian Santanu duduk bahadapan lawan Pulasara. Kurinah jaranih muha Santanu.

      “ Kakang Pulasara, ingsun kada kawa balawas bagana di Gajah Huya. Andika tahu saurang Pasukan Hirang Nagara Tawing Sagara manyarang Astinapura. Jadi ingsun harus bulik. Ingsun mahatiakan kalu dalam malawani kalahi Pasukan Hirang tu punggawa Astinapura nangkaya hayam kahilangan indung. ”

        “ Ingsun mangarti, Adimas. Sual anak andika jangan dihatiakan, ganaakan haja inya di Gajah Huya, sapanyusuan lawan anakku. ”

      “ Ingsun kada tahu kaya apa cara maucapakan tarima kasih lawan andika badua laki-bini, utamanya lawan Adimas Durgandini nang harus mambagi susu lawan anak ingsun. ”

        “ Jangan dipikirakan karana hidup ni kita musti saling batutulungan. ”

        “ Yaahh, Kangmas, kaya apa jua pun budi Kangmas badua laki-bini ganal banar lawan ingsun, kada kawa diukur lawan harta barana. Ujar paribasa urang bahari, pisang amas bawa balayar, bawa balayar ka pasar jati, hutang amas kawa dibayar, hutang budi tabawa mati. ”

        “ Adimas Santanu, jangan kita bapandir sual budi atanapi mambalas budi. Lamun kita tuh manulung urang tapi di dalam hati taniat gasan batanam budi, kadada artinya di hadapan Sangiyang Sukma Suwara. Ihlas nang iyanya, Adimasai. Kami ihlas manarima Radin Diwabarata manjadi bagian hidup kami. Lagian jua tumatan inya mulai manyusu lawan Adimas Durgandini hintadi Diwabarata sudah kuanggap anak saurang.. Nang ngaran sudah anak saurang kadada tabicara sual budi. Kandang mayang susun undayang, sagan katinggiran anak bilalang, kutimang-timang ku sayang-sayang, sama lawan anak saurang. ”

      “ Mudahan apa-apa nang dilakuakan Kangmas badua laki-bini mandapat balasan Sangiyang Sukma Suwara. ” ujar Santanu sambil manangkupakan tangan mambari hurmat lawan Pulasara.

        “ Muhun pamit, ingsun bulik damini jua. ”

        “ Diaturi, Adimas. Lamun kalahi kabaratan jangan aasaan bakiauan….”

        “ Yah, Kangmas. Lamun sudah kada tagiling padati gajah, siapang lagi nang diharap-harap lain pada andika. ”

        Balalu Santanu maninggalakan Gajah Huya. Mamacat kuda supaya balaju bukah nangkaya angin, maambil jalan mahantas maliwati kawasan gunung wan hutan, manyipat Nagara Astinapura.



        Sapaninggal Santanu, Pulasara masuk ka ruang kaguringan. Di situ diliatnya ada dua buting ayunan. Diwabarata wan anaknya nang balum dibari ngaran tu guring dalam pukungan, diayun sambil ditiupakan suling ulih Durgandini.

        “ Kangmas, sakalinya di balukuk tangan Diwabarata ni ada rajah. Lamun diliat rajah tu bawaannya mulai dalam parut. ” ujar Durgandini.

        “ Apa rajahnya, Yayi? ”

        “ Rajah kambang tarati satangah malarak .”

       Sambil baduduk Pulasara maiitihi muha Diwabarata. “ Yayi, kita harus baik-baik mambari kasih sayang lawan Diwabarata.” ujarnya.

        “ Adaah kaitannya lawan rajah di tangannya? ”

       “ Iya, Yayi. Manurut panglihat wan pangrasaku, lamun ganal kaina Diwabarata ni miskin kasih sayang bini-bini. Jadi kaina nang tuhanya haja lagi babisa-bisa. Lamun salah malangkah, ini Diwabarata saumur janang kada guring sabantal lawan bini-bini. ”
        “ Ai, kasiannya pang inya. Napa garang marganya, Kangmas? ”

        “ Kada kawa disambat, Yayi, karana lamun disambat sama lawan mandahului Sangiyang Sukma Suwara. ”

        Tadiam Durgandini. Matanya maiitihi Diwabarata. Diliatnya muntung kakanak tu pinda bilut. Kadada hujan kadada ribut, kadada marga apa-apa, balalu mangiar tangis Diwabarata. Lakas Pulasara manampuk, lakas jua Durgandini maniup suling.

        “ Lalu anak kita kaya apa, Kakang? ” ujar Durgandini limbah ampih tangis Diwabarata.

      “ Anak kita kabalikannya pada Diwabarata. Bakal mandapat kasih sayang bini-bini labih pada diurang. Jadi kita harus baik-baik mandidik inya, salah-salah kaina bisa bacungkarahan papadaan. ”

        “ Ai, bisa kaya itu lah. Kangmas, ulun kada tahu mana baiknya kada mandapat kasih sayang bini-bini lawan mandapat kasih sayang bini-bini labih pada diurang….”

       “ Aku kada tahu jua, Yayi. Kira-kira sama bagusnya sama kada baiknya. Makanya jaku tadi tinggal nang tuhanya babisa-bisa supaya jangan tajadi nang kada-kada. ”

        “ Iyaai, mudahan kita nang tuhanya kawa manuntun hidup kakanak nang badua ni supaya jangan ada nang bakalangan. ”

        “ Iya, Yayi.. ”

        “ Sudahah sampian mandapatakan ngaran sagan anak kita? ”

        “ Sudah, Yayi. Kita bari ngaran inya Bangbang Abiyasa. ”

        “ Bangbang Abiyasa? ”

        “ Iya, Yayi. Aku handak bahabar lawan Kanjang Rama di Wirata kalu talu hari lagi kita cagar mandudus cucu sidin. ”

        “ Inggih, diaturi, Kangmas. ”

        Badiri Pulasara, bajalan ka balai panghadapan. Mangiyau Singaludra wan Minakarida, mamarintahakan bahabar ka Wirata, ka arapan Parabu Basukati.



SUNGAI DARAH ASTINAPURA

        Dua pasukan bahadapan, bahalat padang babatu rajang. Simbar Katawang, pimpinan Pasukan Hirang Nagara Tawing Sagara mamacat kuda ampah ka tangan padang. Aria Basuwanda lakas jua mamacat kuda, manyampuk salajur handak manakuni nangapa maksud mambawa pasukan masuk ka wilayah Astinapura. Kaduanya batamuan di tangah padang, saling maitihi, sama pada manyingking nangkaya hayam jagau hanyar dibanyun.

        “ Satria! Datang mambawa pasukan masuk wilayah Astinapura, matan mana ikam? ”

        “ Aku matan Nagara Tawing Sagara! ”

        “ Tawing Sagara? Di mana itu? ”

        “ Jauh di subarang laut! ”

        “ Maksud? ”

        “ Handak mancari kanak-kanak nang di balukuk tangan kanannya ada rajah kambang tarati. ” ujar Simbar Katawang.
“ Manurut urang-urang pintar di banua kami, itu kanak-kanak adanya di Astinapura. ”

        “ Gasan nangapa garang mancari kanak-kanak tu? ”

        “ Gasan mamalas balai panataian pangantin di banua kami! ”

        “ Kanapa maka balai panataian pangantin harus dipalas? ”

        “ Itu balai panataian gasan mangawinakan anak raja kami. Cuma, ditajak baisukan kamarian runtuh, ditajak malam subuh runtuh. Lalu dibuka patikala dibaca bilangan, lamun kada dipalas lawan darah kakanak nang balukuk tangan kanannya barajah kambang tarati saumur janang kada kawa batajak. ”

        “ Jadi, supaya tatajak balai panataian lalu mambawa pasukan ka Astinapura? ”

        “ Yaaahh, mimang macam itu! ”

        “ Ikam matiilah cagarnya itu kakanak? ”

        “ Nyataai kami matii, darahnya dipapaiakan ka tihang, kapalanya ditanam di bawah balai panataian. Jadi, ada atanapi kada itu kakanak di sini? ”

        “ Lamun ada kaya apa, lamun kadada kaya apa? ”

        “ Lamun ada sarahakan lawan kami. Lamun kadada, kumpulakan saluruh kanak-kanak Astinapura supaya babukti lawan kami bujuran kadada. ”

        Ini urang dasar mancari hual mancari kalahi, ujar Aria Basuwanda di dalam hati. Cakah banar, handak bajual kawanian di Astinapura. Damhatinya kadada nang batukarnya kalu di sini ni.

        “ Ikam anggap kadadakah lalakiannya di Astinapura ni? ”

        “ Nang adakah, nang kadadakah, pukunya turuti ujarku! ”

        “ Wayah dipawayah, tata ya dipatata! Musuh kada dicari, lamun batamu pantang basingkir! ”

        “ Paampihan aku batakun, manurutikah kadakah? ”

      “ Paampihan jua aku bapandir lawan diikam. Ayu bulikan ka banua ikam salagi batis kawa balangkah salagi pahinakan paguni ada! ”

        “ Mun kaya itu, kumpul urang Astinapura! ”

        “ Kumpul urang Tawing Sagara! ”

        Pandir kada badapat, basa kada batamu. Simbar Katawang maangkat tangan kanan baganggam tanda pamandiran kada batarukuian. Langit balah ulih surak Pasukan Hirang. Panji-panji tangkurak putih tulang basilang kibar-kibaran. Tarumpit tanduk sahut-sahutan. Gagaman garirapan. Nangkaya galumbang Pasukan hirang bukah manyasah. Pasukan Astinapura kada hakun kalah. Gandiwa ditarik, anak panah dilapas, tarabang mancari mangsa. Lalu padang baguyang. Dadaunan di pinggiran guguran kaya diguncang.

        Aria Basuwanda manjarat hulu parang ka pagalangan. Ditikinnya parut kuda, bukah kuda manggunting barisan Tawing Sagara, manimpas kiwa-kanan, banyak bubuhan Pasukan Hirang rabahan nangkaya batang pisang ditatak, kuciak kasakitan basasahutan, darah mancurat kaya pancuran. Pancar matahari batambah habang. Batara Yamadipati mahahak, bakunyung di sungai darah.

        Lima hari hudah urang bakalahi, bamula baisukan lacit ka sanja. Kada kaitungan lagi barapa nang mati barapa nang luka. Malam ari bacandak hulu kalahi. Asing-asingnyaai mancarii bubuhan saurang nang luka. Mun tadapat diangkut ka dalam himah gasan diubati. Nang mati sapalih dikumpulakan di atas kayu bapangkih lalu dibanami. Cuma kada kawa barataan pang dikumpulakan, kada mayu arinya. Jadi tatapai kaliatan mayat basapai di tanah nangkaya daun karing musim kumarau. Ada nang batumpang tindih kaya gunung anak. Ada nang sangkut di hutanan pinggiran padang. Ada nang tatilungkup di bawah rapun kakayuan. Ada nang tatilantang di atas batu..

        Malam itu awan sayung bakayuh randah di langit. Bulan salau-salau. Bau mayat dibanam bacampur bau mayat nang bamula buruk bacampur bau darah dibawa angin kamana-mana. Di himah nang pangganalnya Aria Basuwanda lagi mangumpulakan bubuhan pimpinan pasukan, mambicaraakan cara kalahi isuk. Rahatan bapandiran tu tadangar bunyi kuda bukah sing lajuan lalu bacandak bagasut di hadapan himah. Lakas Aria Basuwanda wan buhan pimpinan pasukan mangaluari. Diliat buhannya Santanu baluncat turun pada kuda. Takajut bacampur himung buhannya malihat raja cungul bagagasutan.

        “ Jang Sinuhun Parabu Santanu….” ujar Aria Basuwanda sambil manyambah diiringi buhan pimpinan pasukan.

        “ Iya, Yayi. “ Santanu manyahut. “ Kaya apa kaadaan kita, Yayi? ”

        “ Inggih, kalah kada musti manang balum tantu. Kami lagi mambicaraakan nangkaya apa kita isuk kalahi, kawulunan. ”

        “ Ayu kita bicaraakan barataan. ”

        “ Lun inggih sandika. Ayu sampian diaturi masuk ka dalam himah….”

        Di dalam himah, sambil bamamakan Santanu mandangarakan lapuran Aria Basuwanda.

        “ Jadi itu Pasukan Hirang handak mamalas balai panataian di banuanya lawan darah Anakmas Diwabarata? ”

        “ Inggih, kawulunan. Kaya apa kaadaan Anakmas Diwabarata? ”

        “ Jangan dipikirakan. ” sahut Santanu. “ Susu nang dihajatakan sudah batamuan. Diwabarata kutinggal di Gajah Huya, di pinggir Sungai Simpai Bagalung. ”

        “ Sukur bagia. Jadi kita tinggal mamikirakan kalahi. ”

        “ Manurut pandapatku, kapalanya maka Adimasai nang kita catuk. ”

        “ Maksud sampian macam mana? “

      “ Pimpinan Pasukan Hirang nang ujar ikam bangaran Simbar Katawang tu nang parlu dimatii. Lamun kapalanya ni mati tanggung itu Pasukan Hirang kucai nangkaya anak hayam kahilangan indung. ”

        “ Lamun kaya itu, isuk ulun mambuka jalan darah mamaraki Simbar Katawang. ”

        “ Ikamah nang manuruni, akukah nang malabuni? ”

        “ Jang Sinuhun, urusan Simbar Katawang tu kada sarana ka alah sampian. Lihatakan isuk jajak langkah Aria Basuwanda. ”

        “ Iya, Yayi. Gugu ya digugu, rasa ya dirasa, harap-harap parcaya jangan…”

        “ Lun inggih sandika. Ayu sampian diaturi malalamarakan raraga badan. Biar kami nang mamikirakan cara mambuka jalan darah ampah ka Simbar Katawang. ”

        “ Baik, Yayi. Suruh punggawa maambil panahku nang bagantung di tawing Sanggar Pamucang. ”

        “ Parintah sampian dijunjung di atas batu kapala….”

Santanu bajalan ka himah nang disadiakan gasan inya. Aria Basuwanda wan buhan pimpinan pasukan tarus bamupakat, maatur siasat.



        Bunyi tarumpit tanduk marantas subuh. Hujan sapai-sapai wayah pasukan Astinapura mulai babaris. Gagaman garirapan, talabang manggurincing karana disampuk-sampukakan satu sama lain. Sindin kalahi mangguntur, manggugurakan ambun nang hinggap di daun-daun. Sumangat bubuhan tantara tu naik bakali lipat malihat Santanu badiri sambil mamingkut panah di atas kurita kuda. Di balakang Santanu, di atas kuda putih, duduk Aria Basuwanda wan parang bacabut nang malam tadi sudah dikilir di batu patir.

        “ Wayah dipawayah tata ya dipatata. ” ujar Santanu. “ Ari ini parantunan kita, sakurang-kurang kandal kulit jantur tapa. Ayu, tulakan kita, manarah sungai darah urang Nagara Tawing Sagara! ”

        Lalu gamalan paparangan dipukul. Sambil basurak bukah manyasah pasukan Astinapura. Santanu mamasang anak panah ka gandiwa. Isim-isim dibaca, panah dilapas baubah jadi ratusan, manyambar Pasukan Hirang nangkaya ilat kilat mamacah langit. Talabang nang dipasang kada pati tahan manahani, banyak nang tambus hingga panah maricup ka dada. Abutai tantara Tawing Sagara, apalagi pasukan Astinapura datang bagalumbang. Kuciak kasakitan kuciak kamatian datang basahutan, dianjulakan batu-batu gunung jadi nyahu hingga sakurang-kurang karas hati maka lamahan saribu urat.

        “ Nang mana nang ngaran Simbar Katawang? ” Santanu batakun ka alah Aria Basuwanda.

        “ Tuh, nang di atas kuda di bawah bandira tangkurak putih…” sahut Aria Basuwanda sambil manunjuk ampah ka Simbar Katawang.

        “ Ayu ikam paraki, aku mambukaakan jalan darah. ”

        “ Lun inggih sandika…”

    Santanu mamasang pulang panah ka gandiwa, ditujuakan ampah ka Simbar Katawang nang manguciakan kumandu-kumandu awan pasukannya. Sambil maiiringi hujan panah, Aria Basuwanda mamacat kuda mampimpin tantara pilihan nang hudah tauji kasaktiannya. Napangada mandi darah buhan Pasukan Hirang, humbalingan kada karuan, mati situ saini.

        “ Simbar Katawang! Ayu, jangan bisa manyuruh urang haja kalahi, turun kalu bujur-bujur lalakian! ” Aria Basuwanda manantang.

        “ Baapik pandir! ” ujar Simbar Katawang kada hakun kalah. “ Paampihan ari ini ikam malihat alam tarang! ”

        Jadilah kadua pandal baadu nyawa di tangah padang.

        Timpasan baraung timpasan, manimbulakan kilat api. Sama pada gancang sama pada taguh. Gadabauan parang sangkut ka awak sadikit kada mambari luka, nang ada baju salawar hancur bakas cancangan. Kada puas kalahi di atas kuda maka baluncat ka tanah sambil tarus timpas-manimpas.

        Santanu malihatakan mulai atas kurita, mancari-cari papatin Simbar Katawang. Rasa habis sudah mulai kapala hampai ka batis ditimpasi Aria Basuwanda tatap kada mambari luka.

        “ Adimas Aria Basuwanda! ” Santanu manguciaki. “ Jangan manimpas lawan mata parang, timpasakan balukuknya! ”

        Aria Basuwanda mandangar papadah Santanu. Diputarnya pingkutan parang, kada matanya lagi nang ditimpasakan tapi balukuknya. Rupanya mimang itulah papatin Simbar Katawang. Timpasan balukuk parang tu lawas-kalawasan mamacah urat di dalam awak. Lalu bapikir bukah Simbar Katawang, tapi Aria Basuwanda kada mambari jalan. Akhirnya rabah pimpinan Pasukan Hirang tu, kadada pang darah titik ka bumi tapi awak mumuk di dalam.

        Basurakan pasukan Astinapura.

        “ Simbar Katawang mati! Simbar Katawang hudah mati! ”

        Malihat pimpinan tajangal hudah runtuh sumangat Pasukan Hirang. Bujur ujar Santanu malam tadi, lamun pimpinannya hudah jiun maka anak buahnya nangkaya hayam kahilangan indung. Ada nang paguni mancuba batahan tapi karana kayakinan hudah rusak, hakikat hudah kada miting lagi, saribu ilmu kadada lagi artinya. Nang asalnya taguh kada taguh lagi, babau awak ulih sudukan-timpasan.

        Parak sanja rabahai bandira tangkurak putih wan dua tulang basilang, hancur taamuh-amuh kana jajaki. Manusianya ti sapalih bukahan, sapalih maangkat tangan tanda manyarah. Napangada himung bakaliwaran pasukan Astinapura, manang kalahi pang buhannya. Tarumpit tanduk ditiup pulang, gamalan dipukul pulang. Sambil basurak bulikanai buhan Astinapura ka himah.

      Jadi malam itu basuka-barami pasukan Astinapura, marayaakan kamanangan. Di tangah padang, kada tahu malam burung-burung gagak umpat jua basuka-barami, tarabangan ka situ ka mari sambil mamatuki mayat. Kauk-kauk bunyinya, maningkah bunyi gamalan.



        Siang malam Diwabarata wan Aria Basuwanda bajalan kada baranti, manyasah ari. Sambil di atas kuda Diwabarata batakun lawan Aria Basuwanda: “ Sabujurnya garing nangapa Kanjang Rama Santanu, Paman? ”

        “ Aku kada tahu jua, Anakmas. Cuma manurut panglihatku garing sidin tu kada sambarang garing tapi garing lalakian. ” sahut Aria Basuwanda. “ Kikira haja pang, nang ngaran sidin tu lawas taung lalu litah liur. ”

        “ Maksud Paman? ”

        “ Piungut burung pialing,
        kadangan unjun bamula rabah,
        taungut piragah garing,
        nang bujurnya karindangan supan bapadah. ”

        “ Karindangan? ” Diwabarata manahani tawa.

        “ Cah, tu ti tangguhanku haja pang, tapi mun dilihat tanda-tandanya parak lawan musti itu panyakitnya. ”

        “ Asa kada mambadai sidin karindangan. ”

        “ Nangapa maka kada mambadai? ”

        “ Sidin tu raja. Kada sarana kaya katutupi mangarindangani bulan, tinggal tunjuk siapa urangnya maka kada balanggar ari musti bingsai paguringan karana siapang nang manampik mun bakal jadi sandingan Raja Astinapura. Apalagi urang tahuan barataan sidin tu balu lawas, jadi mun basurung liur tu artinya dasar handak babanaran. ”

        “ Itu tih nang aku kada paham. Asa sadang hudah maunjuni tatap kada hakun manyambar. Kikira bibinian nang dihandaki tu ada hahantukannya hingga tapaksa sidin maarit. ”

        “ Bini urangah kira-kira, Paman? ”

        “ Bulih jadi, tapi bulih jadi jua bibiniannya tu kaanuman, kada sabanding umur lawan sidin. Supan kalu sidin disambat urang bini pantar atanapi anum pada anak. ”

        “ Jadi dimapa pikir, Paman? ”

        “ Itu ti marganya aku maambili ikam. Urang karindangan tuha ni ngalih iiluannya, sasalah kana manyanyarik. Mun kada ikam maka nang manakuni wan maruhuiakan, bapandir buka kulit kalihatan isi. Kada kawa dilihatakan balawas, Anakmasai, bahujung maiyun haja sidin kaina. ”

        “ Hakunalah sidin bapadah mun ulun takuni? ”

        “ Kada tadas sakali, dua kali. Kada tadas dua kali, talu kali. Cari jalannya supaya hakun bapadah. Cuma biasanya mun anak nang manakuni lakas haja bapadah. ”

        “ Inggih, ulun cubai kaina, Paman. ”

        Kuda tarus bukah maninggal gumpalan dabu di balakang. Matahari tarus bakayuh di langit mamburu muhara sanja.
     


        Kararancakan mambilang-buliki anak ka Gajah Huya, kararancakan batamuan wan dilayani Durgandini, balalu rusak hati Santanu. Ai, ujar Santanu, urang ni nangkaya aruah bahari; bingking, simpun, kada pisah wan lihum wayah malayani. Jaka pang urang ni kada bini urang maka kada balanggar ari lagi musti aku badatang, tagal ngarannya bini urang tapaksaai rasa diarit di dalam hati.

        tabang bamban, aduh disayang, diricih-ricih
        rindang dandam, aduh disayang, bamula ampih

        limbah diricih, kasian banar, dibabat pulang
        limbah tadapat, kasian banar, baumpat pulang

      Kaya itulah kaadaan Santanu, kada kawa lagi dibidaakan inya babilang-bulik ka Gajah Huya tu malihati Diwabaratakah atanapi malihati Durgandinikah. Nang nyata, wayah di Astinapura, kadatun sarasa kaya di kuburan, managuk nasi sarasa managuk duri, manginum banyu sarasa manginum racun. Balingsar siang kalawan malam mangganangakan Durgandini, bini Bangbang Pulasara. Jadi kada kaya paribasa, di mana duduk di situ taungut, di mana badiri di situ pikir malayap. Lamun siang ari, pitung kambang walung kutapi, sarasa kuwini si buah mangga, sungsung tabayang landung tamimpi, sarasa Durgandini ada di higa. Lamun malam ari, kanapa bulan kada mangkining, sanunuh timbul kilau-kilauan, kanapa badan kada mau guring, sanunuh guring igau-igauan. (Marasa maka tahu kaya apa manyandang karindangan. Lamun hudah katibaannya tu, bah, piasat tu pang. Ali Syamsudin tu bahari biasa, talu drum ada banyu tawar dikinumakan hanyar ampih. Itu gin lamun manyaurangan bahanu kukuncahung mangiau ngaran bakas sapangan.)

        bangayu manis raga mambi
        mambari maras lalakun hati

        hiyaaaiii…..



        Samingguan Diwabarata malihatakan kaya apa kalakuan kawitan sambil mancari pilawa nang pas sagan manyurung tatakunan.

        “ Samingguan ni ulun itihi andika pinda lain pada nang masi, nangkaya urang banyak pikiran. ” ujar Diwabarata, mamuhara akan pandir wayah inya duduk baduduaan lawan Santanu di Taman Kadatun.

         “ Napa garang dipikirakan, Kanjang Rama? ”

        “ Cah, kada napaapa, mamikirakan banua ni pang….” sahut Santanu, pinda mamahawai pandir.

        “ Banua di luarah banua di dalamah? ” Diwabarata baparnum sambil manyirit.

        “ Maksudnya apa, Anakmas? ”

        “ Banua di luar tu ya Astinapura ni. Banua di dalam tu ya hati Kanjang Rama saurang. ”

        “ Aku kada paham ka mana ampah pandir ikam. ”

        “ Ahuuu ka manakah ampahnya, cuma pangrasa ulun sampian ni istilahnya tu kura-kura dalam parahu, sudah tahu batakun pulang. ” ujar Diwabarata sambil tatawa.

        Santanu tatawa jua. “ Pangrasa ikam napa garang nang kupikirakan? ”

        “ Amun ulun sambat, cung parahu tu….”

        “ Maksudnya? ”

        “ Mun kana kada tahu, Jadi jangan manyanyarik kaina, tiwas ha ulun disuruh manyambat. ”

        “ Masa aku manyanyarik lawan diikam, Anakmas. Ayu, sambat, napa pangrasa ikam aku ni….”

        “ Cah, bintang tujuh tatinggal anam
        karam di rakun nang basulait
        cah, garing tubuh maarit dandam
        barang dimakan tarasa pahit

        hura ahui….ahui….

        Manggalahak Santanu mandangar uuluan Diwabarata. “ Jadi panangguh ikam aku ni lagi karindanganah? ”

        “ Tu ti tatangguhan banarai, bujur kadanya andika nang tahunya. ”

        “ Napa maka ikam manangguh kaya itu? ”

       “ Nang partama, ulun liat andika ni pinda ngalih makan-nginum, rancak taungut. Nang kadua, wayah di Gajah Huya ulun sawat babilangan. .Ujar urang tu garis tangan ulun ni nah, nang pinda bacakang ampah ka tunjuk wan jari manis nih… .”

         Diwabarata manampaiakan talapak tangan, “ itu tanda cagar…bauma tiriiii. Han, tu ti marganya maka ulun manangguh andika lagi karindangan. .”

        “ Lamun babanaran karindangan dimapa ikam? .”

Ai, pinda mamatuk ka umpan karawai nih, ujar Diwabarata dalam hati, kusisit kada bataha, musti tajarikit di bait sakali ni.

        “ Malihat urangnya hulua. Mun asa kada cucuk di hati ulun mandii andika di burit jamban. Tapi mun cucuk haja,

        katutut burung bilatuk,
        amun sapasang basaung buntut,
        amun di hati rasa rasuk,
        ulun saurang nang mamatut. .”

        “ Bah, pinda manalatak pandir, bahira bahanu maucir….”
        “ Naahh, handak sarik yat, maka tadi hudah cung parahu….”

      Tadiam Santanu. Matanya maitihi burung pipit nang lagi bagagayaan di rapun kambang culan. Rupanya pipit tu lagi basapangan, napang pinda rancak basaung patuk. Iniam mun hudah katibaannya ti, ujar Santanu, pipit umpatan mamanasi. Manunurutakan hati kupanah ranai, hanyar tahu rasa tu.

        “ Ayu, Kanjang Rama, kada sarana kaya batatangguhan hapatan manggis. Kita buka kulit kalihatan isi. .” Diwabarta tarus manyungkal.

        Santanu mahiut hinak basar. Tamakan umpan aku sakali ni, ujarnya. Kada kawa bakual lagi ai lain pada kipik-kipik di kawat unjun. Baik mangaku ha daripada inya batatakunan ka lain. Mun batatakunan ka lain tu panjang kisah kaina, labaram jadi kambang pandiran anak kampung bumiputra.

        “ Asam pauh, anakmasai, pidara pandan
        asal jangan pidara pati
        biar jauh, anakmasai, tapi sabadan
        asal jangan jauh di hati. .”

        Naahh, lungkas hudah. Katahuan putingnya. Umaialah, karindangan juaai sakalinya abahku ni ti, ujar Diwabarata sambil maarit lihum. Nang kaya apa jua alah bandanya nang hidin karindangani nih. Burusiahalah babanaran anum pada diaku. Dimapa kaina aku mangiau. Kukiau uma katia anum pada diaku, kukiau ading katia bini kawitan. Bukan ngaliha? (Dikiau mading ranai, arti uma nang umurnya pantar lawan ading. Kada sangalih-ngalih baya kaya itu ti.Iya kalu, Wal?)

        “ Baju cita salawar cita
        jangan tatukar, anakmasai, kain mumut
        malam bacinta siang bacinta
        mudahan, anakmasai, jadi tagarumut. .”

        “ Bagus halaman barapun kambang
        lihat sadahan, kanjang ramaai, pupuk tanahnya
        supaya nyaman ulun manimbang
        sambat ngaran, kanjang ramaai, tunjuk urangnya. .”



       Mahiut hinak basar pulang Santanu. Matanya mamandang lapas ka langit sanja, mairingi awan mautak hundang sapanggiring angin.

        “ Anakmas, lamun kusambat ngarannya maka itu sagan ikam haja. Dalas pacah di landau rahasia jangan dibuka. .”

        “ Lun inggih sandika. Baandak mata parang di rapun gulu lamun kada saijin andika tatap ulun kada manyambat. .”

        “ Urang nang kuangan-angan itu Adimas Durgandini….”

        Takipik Diwabarata nangkaya urang disangat sapit kala. Tabilalak matanya mancangangi muha Santanu. Diliatnya kadada ciri gaya di muha kawitannya tu. Ini makaam, nyaya ngarannya.

        “ Wah, Kanjang Rama…Kanjang Rama…ini makaam sakat urusannya. .” Diwabarata baucap sambil bagaru kapala. Kada habis pikir inya kanapa maka ka situ untingannya.

        “ Itu ti am marganya maka aku balingsar nangkaya iwak dibangkit pada banyu. Tahu ha ikam hahantukannya, ganal pada garuha. .”

       “ Inggih, dasar babanaran ganal pada garuha, karas pada gunung batu. Kada kawa alah dihuhurupi, Kanjang Rama? Bahambur han nang lain, kambang kada sakaki, burung kada saikung. .”

        “ Jaka pang kawa dihuhurupi sudah matan dahulu kuhurupakan, tagal nang ngaran hati, Anakmasai, sadikit kada kawa dikaramputi. .”

        “ Wah, Diwa…Diwa, amun nang itu makaam kadada akal-akalnya ulun, Kanjang Rama….”

        “ Kukus api di gunung lidang
        habu-habunya, anakmasai, kutampi jua
        niat hati talanjur sayang
        balu-balunya, anakmasai, kuhadang jua. .”
      
Santanu baucap sambil balangkah ka dalam kadatun. Tinggal Diwabarata saurangan. Taungut bapayung sanja.

        laut sanghir,
        amas mirahai,
        galumbang silan
        pumput pikir,
        amas mirahai,
        mangganang kawitan

        bulan malayang,
        kasian banar,
        bintang bacaram
        malam siang,
        kasian banar,
        maarit dandam

        Ada garitik kada nyaman di hati Pulasara wayah mulai mamuja samidi di sanggar pamucang kadatun Gajah Huya. Ujar Pulasara napa pulang wahana maka hati pinda dibar-dibaran nangkaya umbak lautan. Asa kadada panyalah aku. Anak-bini bigasan haja. Adimas Santanu manurut habar nang dikirim Diwabarata bigas haja jua. Kulawarga di Wirata kada kurang suatu apa. Jadi napa wahananya?

        Tuhuk Pulasara mambuang pikir hanyar kawa masuk ka ruang puang. Tangah malam jantur tapanya karana di hadapannya cangul Sangiyang Aji Narada. Diwa nang pinda daknal wan rajin bagaya tu sakali ni pinda lain pamarum muha, pinda ada sual ganal nang handak dipandirakan.

        “ Radin Pulasara, aku diutus Sangiyang Jagat Nata bapandir lawan ikam. .”

        “ Inggih, sual nangapa, kawulunan? .”

        “ Sual janji. .”

        “ Sual janji? .”

        “ Sual janji lawan bungkut ikam bahari. .”

        “ Janji handak manjadiakan katurunan kami raja basar ituah? .”

        “ Yaahh, mimang macam itu. .”

      “ Inggih, sual ituam nang mangalang ka ulun. Manuntut salah, baranai salah jua. Manuntut salah karana nangkaya kada parcaya lawan janji. Baranai salah karana kaya kadada usaha, sabab sakurang-kurang takdir maka usaha jua parlu. Bahanu timbul dalam pikiran ulun, imbah ulun kumpulakan tantara lalu ulun sarang karajaan-karajaan, jadiam katurunan ulun kaina raja basar. Tapi tapikir pulang mun kaya itu caranya bakarasan ngarannya, mancagatakan bandira di sungai darah, bajajak di bangkai urang. Jadi hampai wayah hini kada tahu lagi ulun nangapa nang harus digawi. .”

        “ Bagus lamun ikam bapikir kaya itu karana mimang kada bakakarasan jalan takdirnya. .”

        “ Inggih, jadi dimapa? .”

       “ Bakurban, itu jalannya Pulasaraai. .” ujar Sangiyang Aji Narada.

      “ Bakurban maksudku ni bakurban nang baik. Ikam kawa damping lawan Sangiyang Sukma Suwara salajuran anak ikam kawa jadi raja basar. .”

        Pulasara kada manyahut, mahadang sambungan pandir Sangiyang Aji Narada.

        “ Ingatlah ikam kalu di dalam darah ikam tu kadada juriat raja? Nang ada di anu ikam tu juriat bagawan. .”

        “ Inggih, ulun ingat banar, kawulunan….”

        “ Jalan hudah tabuka karana ikam kawin lawan juriat raja, baarti di darah anak ikam hudah ada juriat raja. Jadi syarat nang utama ada hudah lawan katurunan ikam, tinggal wayah wan caranya. .”

        “ Lalu pabila wayahnya? .”

        “ Pukunya lagi balum ikam atawa bini ikam mati hudah jadi raja basar anak ikam nang bangaran Abiyasa tu. .”

        “ Sukur bagia, sawat pang ulun malihat inya linggih-linggih saking dadampar kancana. .”

        “ Yaah, tinggal lagi sual caranya. Cara itulah nang kusambat tadi ti manuntut pangurbanan ikam. .”

        “ Pangurbanan macam apa? .”

        “ Karana asal-muasal ikam bagawan maka babulik jadi bagawan. Lapas Gajah Huya. Lapas bini. Lalu bulik batapa ka Wukir Ratawu sambil mandidik Abiyasa. .”

        Takarisut dahi Pulasara. “ Sual malapas Gajah Huya ulun kada kabaratan karana asalnya ini nagara mimang kadada. Tapi mun malapas bini, waah, kami paguni basasayangan, kawulunan. Jadi ulun bawa bini ulun ka Wukir Ratawu. Ulun bujuki inya supaya hakun hidup ambagawan di paratapan. .”

        “ Lain kisahnya lamun damintu. .” Sangiyang Aji Narada tatak batang. “ Apalagi di darah bini ikam tu sadikit kadada darah bagawan, darah raja-raja banarai, urang nang patuh hidup nyaman. .”

        Tadiam Pulasara. Di matanya tabayang muha Durgandini. Akaiaduh, talanjur jalan nasib malalakunakan.

        “ Aku hampai di sini haja bapandir. Kaputusannya tasarah lawan ikam. Cuma ingatakan, lamun ikam kada hakun bakurban kaya itu maka pagat janji kita. Jadi jangan bapanyasalan kalu kaina di hadapan Sangiyang Sukma Suwara katurunan ikam manuntut tanggung jawab ikam karana ikam pang nang mamagati janji lantaran kada sanggup manjalanakan syaratnya. .”

        Tuntung baucap balalu hilang Sangiyang Aji Narada.. Tatinggal Pulasara ungut-ungut kaya burung piungut patah halar. Di luar, bulan bagigimitan manggarak matahari. Matahari bangun sambil mahirup ambun. Burung-burung mandian sambil banyanyi. Hayam kungkuukan sambil mandabik halar.

        kambang cuwadak, umaialah, disari kumbang
        di situ handak, umaialah, di sini sayang

        gana di sia, dimapa akal, kayu basangkut
        ka mana jua, dimapa akal, aku bapingkut



        Babulan-bulan Pulasara mamikirakan kada jua pakulih kaputusan. Kada mayu utaknya aku mamikirakan saurangan, ujar Pulasara, baik kubawai bini bapandir, kalu-kalu inya ada baisi pamikiran hingga di situ baik di sini kada jahat. Jadi wayah handak guringan diungkai kisah ulih Pulasara. Titik banyu mata Durgandini mandangar napa nang harus dipilih. Ujar Durgandini, ini makaam nangkaya buah simalakama, dimakan mati uma kada dimakan mati bapa.

        “ Wah…Kangmas….Kangmas, kada ulun kira jalan nasib nangkaya nia…”

      “ Iyaam, Adimas, sama barat pilihannya. Ayu kita timbang bujur-bujur supaya jangan bapanyasalan. Di sisa umur kita ni, kita hidup gasan kita hajaah atanapi gasan anak cucu kitaah….”

        Lawas Durgandini bapikir. Diingatakannya kajadian-kajadian wayah bahari. Ujar Durgandini, jaka bahari tu kada Pulasara bulih jadi tatap buruk awakku, mun kada lawas hudah mati paling kada taasing sapanjang masa jadi tukang kayu jukung; cakada bakalan baranak-babuah karana kadada urang nang hakun kawin lawan diaku. Limbah baranakan ni tabanyak mamikirakan kaya apa hidup anak kaina daripada mamikirakan diri saurang, sabab hudah sarabanya pang kujalani, wayah-wayah nang pahit kaya himpadu, wayah-wayah nang manis kaya gula.

    “ Kakang Pulasara, lamun kaya itu pilihannya maka maaf ampun kalu ulun tabarat ka anak, Kangmas. Bukan ulun manidaakan sampian, tapi ulun kada handak kalu kaina bapanyambatan wayah bahadapan lawan Sangiyang Sukma Suwara….” muntung Durgandini baucap tapi pipi hibak barubuian lawan banyu mata.

      “ Iya, Yayi, pamikiran ikam tu sabujurnya sama lawan pamikiranku. Dalam sisa hidup kita ni dua haja lagi nang parlu diupayaakan sabulih daya. Partama, kaya apa sakira kita kawa damping lawan Sangiyang Sukma Suwara. Nang kadua, kaya sakira hidup anak kita labih pada kita. ”

        “ Inggih, ulun mangarti, Kangmas…”

        “ Lamun kita sudah baisi kaputusan ni maka ingatakan pasanku: jangan ikam talalu takarut lawan wayah bahari. ”

        “ Maksudnya kaya apa? ”

       “ Artinya, jangan talalu maingatakan aku anatapi Abiyasa. Lamun ada urang handak lalu ikam timbang kawa dijadiakan sandaran hidup maka kawin haja ikam. ”

        Jadi kada kaya paribasa, sambil batitikan banyu mata Durgandini wan Pulasara malalui malam paampihan balaki-babini karana isuk ari bakal bapupunahan. Sayung muha Durgandini malipatiakan baju pakaian. Sayung jua muha Pulasara mamandang bintang-bintang nang sumarak di langit. Lamat-lamatan kadangaran garicik banyu Sungai Simpai Bagalung, manyanyiakan riristaan lawan batu-batu.

       Sunyi jualah nang manyalimputi hati Durgandini. Rancak inya duduk taungut di pinggiran Sungai Simpai Bagalung, maiingatan manisnya wayah dahulu lawan Pulasara, wayah bajujukungan sapanggiring sungai, wayah batatawaan basisimburan banyu sambil basisimpanan di higa batu-batu, wayah babubukahan di sala putih kambang halalang. Kada sakali dua titik banyu mata Durgandini. Marista tu pang judulnya. Napang, diri balu, handak bulik ka Wirata kawitan hudah matian, ading nang jadi raja sudah baranak buah, ngalih saurang maandak diri. Bagana di Gajah Huya ya kaya itu ti pang, kabanyakan iingatan wayah bahari, apalagi inya tahu bubuhan punggawa di kadatun rata-rata lain manusia bujur-bujur tapi manusia jajadian binatang.

        jaka parahu, kasian banar, jalan ka jalai
        jaka kutahu, kasian banar, diri tacarai

        patah bilah, umaialah, pinda basusun
        batuahalah, umailah, cakada hakun

        Jadi macam-macamai laluan digawi, sahibar maaur hati. Nang paling rancak tu maunjun. Maunjunnya tu lain pulang pada nang lain, kada iwak dicari tapi sahibar malaluakan ari. Mun kabalujuran iwak mamatuk diitihi satumat, dipacul pada bait kawat lalu dilapas pulang ka sungai. Diunjuni pulang, disisit, dipacul, dilapas pulang. Kaya itulah gawian Durgandini hari ka lawan hari.

        Ari itu maunjun pulang inya. cuma sakali ni kada jauh lawan inya duduk Diwabarata nang datang malam tadi mailangi. Diilangi Diwabarata tu rasa himung hati Durgandini, rasa ada bakawan balaluan. Parak sapanjang malam bapapandiran. Tagal wayah bapapandiran tu diam-diam batagur hati Durgandini karana malihat parigal Diwabarata lain pada nang masi, tabanyak kurihing simpak, tabanyak tawa bapaksa. Adapun Diwabarata jadi kaya itu karana marasa saraba salah. Rancak hudah pandiran handak mandatangakan kawitan hampai di hujung ilat tagal kada mau tasurung.

        “ Anakmas Diwabarata, kadatangan ikam sakali ni kulihat pinda lain pada biasa. Sayung pamarum muha nangkaya urang manyandang lara kabaratan. ” ujar Durgandini sambil maiitihi muha Diwabarata.

        “ Inggih, sabujurnya jauh di dalam hati ulun ada manyimpan kahandak, cuma ngalih sasambatannya….” sahut Diwabarata.

        “ Ai, napa kahandak ikam? Sambat ha Anakmasai, jangan aasaan. Lamun barang nang ikam kahandaki ada di Gajah Huya kada sarana dua kali manyambat langsung kujulung. ”

        “ Ituam nang maulah ngalih, kawulunan, karana nang ulun kahandaki kada barupa barang. ”

        “ Kada barupa barang? Lalu barupa apa, Anakmas? ”

        Diwabarata manyusut paluh dingin nang lilih di muha.

        “ Barupa manusia…” Diwabarata manyahut sambil batundukan.

     Takarisut satumat dahi Durgandini lalu lihum inya lantaran paham kamana ampah pamandiran Diwabarata. Ai, ujar Durgandini dalam hati, handak babini sakalinya Utuh ni.

        “ Bibiniankah nang ikam kahandaki tu? ”

        “ Inggih, bibinian….”

        “ Urangnya tu ada di Gajah Huya? ”

        “ Inggih, ada di Gajah Huya…”

        “ Siapa, Anakmas? ”

        “ Itulah nang ulun ngalih manyambat. Cuma supaya sampian jangan salah mangarti, bibinian tu kada gasan diulun. ”

        “ Kada gasan ikam? Lalu gasan siapa? ”

        “ Gasan Kanjang Rama Parabu Santanu….”

        Tadiam Durgandini. Bagaritik hatinya. Ujar Durgandini, lamun Santanu handak kawin itu hal nang wajar karana walasan tahun hudah kamatian bini. Lamun bibinian nang dikahandakinya ada di Gajah Huya ni kada bangangalihan Diwabarata manyambat ngarannya atanapi manunjuk urangnya karana kadada hahantukannya. Ini Diwabarata ngalih manyambat urangnya, ajin nang dikahandakinya tu….

        “ Akuah nang dikahandaki Kanjang Rama ikam? ”

        Diwabarata kada manyahut cuma kapalanya bagigimitan bauntuk.

        “ Umailah….” ujar Durgandini sambil mamandang matahari sanja.

      “ Ulun banyak-banyak minta ampun lawan sampian. ” ujar Diwabarata, tatap sambil batundukan kapala. “ Kahandak Kanjang Rama Santanu mimang katalaluan, tapi nang ngaran hati rusak ngalih titimbangannya. Siang kalawan malam maarit karindangan. Di mana duduk di situ taungut, makan-nginum kada karuan, guring igau-igauan. Jadi malihat kawitan kaya itu kada purun hati ulun. Mandangar habar sampian hudah bapisahan lawan Kanjang Rama Pulasara bawaniai ulun datang ka alah sampian, baharap sampian tabuka hati manarima kasih sayang Kanjang Rama Santanu….”

        “ Anakmas Diwabarata, wayah handak bapisahan dahulu Kakang Pulasara batinggal pasan, mun ada nang handak lawan diaku lalu aku marasa urang tu kawa jadi sandaran hidup maka kawin haja. Jadi sual kawin tu bagi aku bukan masalah karana manurut panglihatku Kakang Santanu tu tamasuk urang nang baik, urang nang kawa dijadiakan sandaran hidup. Cuma, Anakmas, nang ngaran kawin sama pada tuha ni banyak nang parlu ditimbang. ” ujar Durgandini.

        “ Umpamanya sual apa, kawulunan? ”

        “ Sual masa datang anak-anakku kaina kalu umpama kami baranakan. Nang ngaran umur ni, Anakmasai, kada babau, kada tahu kita panjang handapnya. Jadi lamun pada takdir Kakang Santanu atawa aku atanapi kami badua dikiau Sangiyang Sukma Suwara, kaya apa nasib anak-anakku kaina. ”

        “ Inggih, lamun sual itu jangan dipikirakan, asal ulun paguni ada tatap tajamin hidup anak-anak sampian. ”

       “ Aku kada manidaakan ikam, anak tatuha Kakang Santanu nang bakal jadi pawaris Astinapura. Cuma, Anakmas, biar anak-anakku tu dangsanak tiri ikam tapi di mata urang Astinapura tatap inya tu itungannya urang lain. Ibarat bakadudukan maka kadudukannya tu kada nahap karana bagantung lawan diikam. ”

        Bujur jua andih sidin itu, ujar Diwabarata dalam hati. Kawin sama pada tuha salah-salah bahujung maharagu wan mangganalakan anak haja.

        “ Maksud sampian macam mana? ”

        “ Anakku jadi waris Astinapura! ” Durgandini malungkasakan pandir. “ Artinya, lamun Kakang Santanu turun pada dadampar kancana maka anak kami kaina nang manduduki dadampar kancana Astinapura. ”

        Bagamat Diwabarata maangkat kapala, mamandang ampah ka muha Durgandini. Kaingatan inya kaya apa bahari umpat manyusu lawan Durgandini. Jaka kada Durgandini tuh hakun mambari susu kaya apakah hidupnya. Lagian jua tantu Astinapura hudah hancur dapatnya Pasukan Hirang urang Nagara Tawing Sagara, sasuai ramalan Bagawan Kasapa. Kaingatan jua inya kaya apa kawitan balalah ampah matahari pajah mancariakan susu sampai ka Gajah Huya, sawat dipadahakan urang gila, bahkan bataruh panyawaan sapanjang jalan. Budi nang ditanam kanjang rama wan Durgandini tu hutang nang kada kawa kubayar sapanjang hidup. Jadi, ujar Diwabarata, kada jadi raja aku kada apa-apa jua asal kawitan wan Durgandini mandapat kabahagiaan.

        “ Inggih, ulun kada kabaratan anak sampian kaina nang jadi raja Astinapura. ”

        “ Yaah, Anakmas, ikam bujur kada kabaratan, tapi kaya apa kaina anak-anak ikam. Sasalah kana kaina jadi hual ganal karana inya marasa baisian hak jua. Jadi manurut pandapatku paraya ah kita bakawinan. Bukan aku kada manarima Kakang Santanu, tapi mamikirakan akibatnya kaina. Baik amun bararangutan haja, Anakmasai, kalu pinda kaina barungkis papadaan, bamatian marga marabutakan dadampar kancana Astinapura. Labaram kita nang tuhanya nang manyandang hukuman Sangiyang Sukma Suwara. ”

        “ Sampian kada usah hara mamikirakan anak-anak ulun kaina karana ulun kada bakalan baranakan. ”

        “ Maksud ikam? ”

        “ Ulun kada bakal kawin sapanjang masa! ”

        “ Anakmas, kasiam jangan digagayaakan, Anakmas. ”

        “ Ulun kada bagaya. Disaksiakan Sangiyang Sukma Suwara, saluruh Diwa saluruh Batara, asal pian kawin lawan Kanjang Rama Santanu maka ulun basumpah kada kawin sapanjang masa! Bila ulun malanggar maka ulun mati disambar patir! ”

        Sumpah kada kawin sapanjang masa hudah diucapakan Diwabarata. Balum pacah riak di bibir, balum karing buih di muntung, balum taguh lumbang di dada, balalu situ saini ari kadap tantiru. Guntur mandaram, patir galantaran, kayangan guncang, balai gantung angin kaya dilimbung, turun hujan sapai-sapai barupa banyu mata bidadari kayangan, manangis tarabangan sambil mahambur kambang sapanggiring Sungai Simpai Bagalung. Taungut Paramasti Guru Diwa Alam, kipuh Sangiyang Aji Narada, balinjang Batara Yamadipatri, manyaksiakan pangurbanan Diwabarata. Jantur tapa Pulasara di Paratapan Wukir Ratawu karana guha baguncang, banyu talaga manggurak kaya di jarang. Baguncang jua dadampar kancana Astinapura, mandibar hati Santanu karana saluruh pusaka nang bagantung di tawing habis tanggalan. Bagulak saluruh ulak Sungai Simpai Bagalung. Balalu kadangaran siwara matan dalam banyu mamadahakan mulai ari itu Diwabarata jangan lagi dikiau Diwabarata tapi kiau lawan ngaran Bisma karana pangurbanannya gasan kabahagiaan kawitan ganal pada garuha.

        Lamah saluruh urat Durgandini, hanyar inya kaingatan papadah Pulasara bahari supaya nang tuhanya babisa-bisa karana salah-salah langkah Diwabarata bakal miskin kasih sayang bini-bini. Rupanya hampai hudah wayahnya ramalan jadi kanyataan karana aku kabangatan bapikir diri saurang haja. Kada kukira kada kusangka kaya ini kajadiannya. Tapi apa daya, basa hudah talapas sajari kada kawa dijuhut lagi.

BAPACAH

        Alalia pun apa karsani. Manurut di dalam caritanya, balalu diadaakan balai sakadumas balai panataian, dihias bamacam ragam. Ampat puluh hari ampat puluh malam urang basuka barami di Astinapura, mangawinakan Santanu wan Durgandini. Sagala macam karasmin diadakan, hibak undangan datangan, maklum raja nang kawin. Ujar Santanu, hampai ka jaka hudah aku ni, tulus hajat salapik sakaguringan lawan Durgandini. Barakat Sangiyang Sukma Suwara mudahan kami ruhui rahayu tuntung pandang sampai ka mati.

        Di taman kadatun, Bisma mancangangi rajah kambang tarati di balukuk tangan kanannya. Di langit, bulan salau-salau bakunyung bagigimitan, bahanu timbul bahanu tinggalam di sungai awan. Wayah timbul di tangah langit Bisma malihat muha bini-bini baik rupa lihum bapair tapi banyu mata balilihan di pipi. Ai, ujar Bisma, umakuah itu? Kanapa sidin maka lihum sambil manangis? Daun-daun garisikan manyahuti. Banyanyi sunyi. Ah! Ah!

        bangayu manis raga mambi
        simpuni hulu wayang ka pati
        hiyaaaiii……..



Home :: Guestbook